Ekipi mbrojtës i kryetarit të Bashkisë së Tiranës, Erion Veliaj, ka zhvilluar sot një vizitë në qelitë e paraburgimit në Durrës, një ditë përpara se Gjykata e Apelit të shqyrtojë kërkesën për lirimin e tij me kusht.
Në këtë vizitë ishte i pranishëm edhe Joshua Roberts, përfaqësues i firmës ligjore amerikane Kasowitz Benson Torres LLP, e cila ofron këshillim për çështjen e Veliajt.
Pas takimit, Roberts dha një deklaratë për mediat, duke theksuar se ndodhet në Shqipëri për të ndjekur nga afër procesin dhe për të monitoruar respektimin e standardeve ndërkombëtare të drejtësisë.
Sipas tij, mbajtja në paraburgim e një përfaqësuesi të zgjedhur politik, pa akuza të qarta dhe pa prova që të justifikojnë masën e sigurisë, është në kundërshtim me parimet themelore të një shteti ligjor dhe të një sistemi demokratik. Roberts shtoi gjithashtu se do të ndjekë personalisht seancën e nesërme të Apelit, ku pritet të shqyrtohen argumentet ligjore në mbrojtje të Veliajt.
"Mbajtja e një politikani në paraburgim pa akuza të qarta dhe pa një rrezik të justifikuar është në kundërshtim me parimet e shtetit ligjor dhe demokracisë”, u shpreh Roberts. /Versus.al/
