Kur kanë mbetur edhe pak orë nga përfundimi i afatit për dorëzimin e listave të kandidatëve për deputetë, në koalicionin e drejtuar nga Partia Demokratike, kanë nisur largimet e para.
Partia ‘Aleanca e Maqedonasve për Integrim Europian’ ka dorëzuar në KQZ kërkesën për t’u larguar nga koalicioni opozitar i kryesuar nga kryedemokrati Sali Berisha.
Kërkesa e dorëzuar në KQZ:
Lënda: Kërkesë për çregjistrimin e AMIE-së nga koalicioni zgjedhor "Partia Demokratike - Aleanca për Shqipërinë Madhështore"
I nderuar z. Celibashi,
Partia Aleanca e Maqedonasve për Integrimin Europian (AMIE) njofton tërheqjen nga koalicioni zgjedhor "Partia Demokratike - Aleanca për Shqipërinë Madhështore", për zgjedhjet për Kuvendin e Shqipërisë të datës 11 maj 2025.
Në këtë kuadër, ju kërkojmë të çregjistroni emrin e partisë sonë nga ky koalicion.
Duke ju falënderuar për bashkëpunimin dhe mirëkuptimin tuaj.
Me respekt,
Kryetari i partisë
Aleanca e Maqedonasve për Integrimin Europian, Vasil Sterjovski. Vetë kreu i partisë ka bërë me dije se shkak për largimin nga koalicioni është bërë fakti se nuk është plotësuar kërkesa e AMIE për të pasur një kandidat në listën e kandidatëve të Korçës. Ai gjithshtu ka bërë me dije se edhe kërkesa për të pasur një kandidat në listat e qarqeve të tjera, është refuzuar. Versus.al
