Kryeministri Edi Rama ka reaguar lidhur me angazhimin e prokurorëve të SPAK lidhur me zgjedhjet e 11 majit për të ndaluar krimet zgjedhore. Ai bëri thirrje që të ndalet survejimi i partive politike në terren, duke pretenduar se kështu shkelen të drejtat dhe liritë e qytetarëve për të zgjedhur.
“Respektimi i standarteve të një drejtësie europiane është një tjetër betejë. Nuk mund dot të cënohen të drejtat e pushtetit ekzekutiv apo të trysnohet administrata e shtetit, nuk mund dot të survejohen partitë politike në një proces elektoral. Unë uroj që kjo të jetë një lajthitje e momentit dhe menjëherë të ndalet çdo lloj survejimi në territor sepse nuk mundet dot kurrën e kurrës që të kthehemi në kohëra aq të errëta se kushdo që merret me politikë të survejohet”- u shpreh Rama.
Ai shtoi më tej se lufta kundër krimeve zgjedhore duhet të bëhet me bashkëpunim dhe jo nëpërmjet survejimit të pushtetit ekzekutiv.
“Përpjekja e përbashkët për të luftuar krimet elektorale, bëhet secili në pozicionin e vetë. Dalja nga këto pozicione është ndërhyrje flagrante në liritë dhe të drejtat politike të shqiptarëve. Por mes këtyre është edhe domosdoshmëria për të mbështetur fuqimisht SPAK-un dhe GJKKO dhe të mos survejojmë njëri tjetrin”- deklaroi kryeministri.
Ditën e djeshme, Prokuroria e Përgjithshme njoftoi se brenda 10 ditëve do të ngrihen 13 grup seksione në vend të angazhuara për denoncimet dhe rastet e parandalimit të krimeve zgjedhore. Më herët SPAK ka bërë me dije ngritjen e task forcës me prokurorë të posaçëm të shpërndarë në qytete të ndryshme për të bërë të mundur garantimin e zgjedhjeve të lira dhe pa trysninë e grupeve kriminale ndaj qytetarëve. Versus.al
