Biznesmeni Luçiano Koçeku së bashku me 3 të afërm të tij janë shpallur në kërkim nga policia për përfshirjen në rrahjen e Adriatik Roshit dy ditë më parë në një berberhane të Tiranës.
Sipas policisë, dyshohet se organizatori i rrahjes së 48 vjeçarit ka qenë vetë biznesmeni i cili njihet ndryshe edhe si “Tur Koçeku”, ndërsa i afërmi i tij Gani Koçeku dhe nipi Ledio Tusha të cilët janë arrestuar, dyshohet se kanë bërë rolin e vëzhguesve.
Ende nuk dihet arsyeja e dhunimit me sende të forta të Roshit, por kjo nuk është hera e parë që emri i biznesmenit Tur Koçeku përmendet në një përleshje fizike.
Më 24 gusht të vitit të kaluar ai u bë protagonist në një sherr masiv në një lokal nate në Palasë. Ai mbeti i plagosur rëndë në spital pas dëmtimeve që pësoi në kokë. Shkak për sherrin me Fatmir.B dhe grupin që e shoqëronte mësohet se u bënë trëndafilat dhe shapanja e hedhur drejt këngëtarëve grekë që performonin.
Fatmir.B ka kërkuar llogari përse trëndafilat ranë në tavolinën e tij dhe aty ishte pikënisja e përplasjes së ashpër. Pasi doli nga spitali, biznesmeni Artur Koçeku refuzoi të ngrinte kallëzim në polici duke argumentuar se i kishte zgjidhur problemet me palën tjetër pasi kishin qenë në gjendje të dehur.
I lindur në Bulqizë, Turi Koçeku ka zgjeruar aktivitetet e tij që datojnë nga viti 2014. Tur Koçeku e ka ndarë jetën mes Tiranës ku ka biznese të tjera dhe në Dubai ku ishte vendosur prej kohësh. Versus.al
