Mjeku Ilir Shani, i cili kreu ndërhyrjen kirurgjikale ndaj 54-vjeçares që ndërroi jetë në spitalin e tij privat në Durrës, ka reaguar për herë të parë në lidhje me ngjarjen tragjike, duke dhënë detaje mbi ecurinë e operacionit dhe gjendjen shëndetësore të pacientes deri në momentin e ndarjes nga jeta.
Sipas Dr. Shani, ndërhyrja kirurgjikale u realizua me sukses dy ditë më parë dhe pacientja ishte në gjendje shumë të mirë pas operacionit.
Ajo paraqitej aktive, pa shqetësime dhe me parametrat jetësorë normalë. Megjithatë, mëngjesin e 21 majit, pacientja pësoi një arrest kardiak të papritur, nga i cili nuk arriti të rikuperohej, pavarësisht përpjekjeve për reanimacion.
Viktima, që është identifikuar si Valbona Xh., banuese në Durrës, u përcoll këtë mesditë në banesën e fundit.
Reagimi i plotë i mjekut Ilir Shani:
Në vijim të ngjarjes së rëndë që ndodhi para dy ditësh në ambientet e spitalit tonë, ndjej për detyrë morale dhe profesionale të paraqes një sqarim mbi pozicionin tonë si institucion shëndetësor dhe timin personalisht si mjek përgjegjës.
Së pari, në emër të stafit mjekësor dhe në emrin tim personal, i shpreh ngushëllimet familjarisht më të sinqerta familjes së të ndjerës V.XH. Kjo humbje është thellësisht e dhimbshme për të gjithë ne, pasi e ndjera ishte jo vetëm paciente, por edhe një e njohur e afërt e jona për të cilën ushqenim respekt të veçantë. Ndajmë dhimbjen dhe qëndrojmë pranë familjarëve në këtë moment të vështirë.
Si mjek përgjegjës, ndjej detyrimin të sqaroj rrethanat e kësaj ngjarjeje të trishtë, duke u udhëhequr nga parimi i transparencës ndaj familjarëve dhe qytetarëve.
Pacientja V.XH iu nënshtrua ndërhyrjes kirurgjikale të ngushtimit te stomakut më datë 20.05.2025. Operacioni përfundoi normalisht dhe pacientja u transferua në pavijon në gjendje të mire. Gjatë orëve në vijim, gjendja e saj u monitorua vazhdimisht dhe parametrat jetësorë rezultuan brenda normave.Pacientja ishte aktive , lëvizte , komunikonte , nuk kishte asnje shqetesim .
Fatkeqësisht, ne te gdhirë te dates 21 , pacientja pësoi një arrest kardiak të menjëhershëm, pasojë e një infarkti akut masiv, dhe ndërroi jetë brenda pak minutash. Megjithëse ndihma mjekësore u ofrua menjëherë , goditja rezultoi fatale dhe përpjekjet për ta rikthyer në jetë nuk patën sukses.
Në emër të vetes dhe të të gjithë stafit që ka qenë i përfshirë në trajtimin e pacientes, shpreh keqardhjen më të thellë për këtë humbje. E kuptojmë dhe ndjejmë dhimbjen e familjes dhe jemi të gatshëm të ofrojmë bashkëpunimin e plotë me organet përkatëse, të cilat do të hedhin dritë mbi çdo aspekt të kësaj ngjarjeje.
Me respekt dhe përulësi para dhimbjes së familjes,
Ilir Shani.Versus.al
