Elsa Gjeli, prokurorja e Shkodrës, emri i së cilës u bë publik nga vetë kryeministri Edi Rama sa i takon mosfillimit të hetimeve për një ndërtim pa leje në Theth, i ka dërguar një shkresë KLP-së.
Në letrën e dërguar, Gjeli shpreh shqetësimin mbi situatën e krijuar ku emri i saj po lakohet vazhdimisht në media dhe ka kërkuar një reagim nga instritucioni i Këshillit të Lartë të Prokurorisë. Shkresa e saj është renditur në listën e kërkesave për shqyrtim, por nuk dihet nëse kjo do të ketë vendimmarrje.
“Në përputhje me kompetencat tuaja, lutem nga Këshilli i Lartë i Prokurorisë, që: Të analizojë sjelljen e Kryeministrit në kontekstin e cenimit të pavarësisë së Prokurorisë dhe respektimit të ndarjes së pushteteve; Të shqyrtojë mundësinë e një deklarate zyrtare në mbrojtje të trupës së Prokurorëve nga sulme të papranueshme politike, duke theksuar se në lidhje me rastin tim individual jam e gatshme të hetohem para të gjithë organeve të drejtësisë;
Të ndërmarrë hapa institucionalë për të garantuar sigurinë dhe integritetin profesional të Magjistratëve që ndihen të persekutuar për shkak të vendimeve të tyre të pavarura. Deklaroj se jam e gatshme të paraqes çdo dokument shtesë dhe të dëshmoj personalisht për ndikimin që këto deklarata kanë pasur në mjedisin tim profesional dhe emocional”, shkruan Gjeli në letrën drejtuar KLP
Kujtojmë se dje, ministri i Drejtësisë Ulsi Manja iu drejtua Inspektoriatit të Lartë të Drejtësisë për t’i kërkuar nisjen e veprimeve disiplinore. Më herët edhe prokuroria e rrethit të Shkodrës, ka shprehur shqetësim mbi deklaratat e bëra nga kryeministri Edi Rama, ndërsa ka pretenduar se prokurorja ka vepruar në bazë të referimit të policisë vendore. Versus.al
Gjykata e Posaçme kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për tre nga të arrestuarit në kuadër të megaoperacionit të SPAK për goditjen e trafikut ndërkombëtar të drogës dhe pastrimit të parave.
Në seancën për vlerësimin e masave të sigurisë, gjykata vendosi të mbajë në burg Orest Sotën, Orgest Birçajn dhe Dritan Agën. Ndërkohë, për Gëzim Islamin u vendos lirimi për arsye shëndetësore kundrejt një garancie pasurore prej 100 mijë eurosh.
Katër të arrestuarit dolën para Gjykatës së Posaçme këtë të shtunë, ndërsa seanca nisi në orën 09:00. Procesi u ndërpre për rreth dy orë pas kërkesës së avokatëve mbrojtës, të cilët kërkuan kohë për t’u njohur me aktet hetimore të dosjes.
Pas rifillimit të gjykimit, trupa gjykuese shqyrtoi kërkesat e palëve dhe vendosi masat e sigurisë për secilin prej të dyshuarve.
Në sallëne gjyqit ishin të pranishëm kreu i SPAK, Altin Dumani, prokurorja Elida Kaçkini dhe gjyqtarja Flojera Davidhi.
Megaoperacioni i SPAK ka në fokus goditjen e grupeve të përfshira në trafikun ndërkombëtar të narkotikëve dhe skemat e dyshuara të pastrimit të parave përmes investimeve në sektorin e ndërtimit. Hetimet për këtë çështje vijojnë.Versus.al
