Menjëherë pas sekuestrimit të celularit të Haxhiut në burgun e sigurisë së lartë në Drenovë, celulari është sjellë në laboratin digjital të Prokurorisë së Posaçme, ku pritet të zbërthehet për të parë komunikimet e “të fortit” të Lushnjes.
Laert Haxhiu është dënuar me burgim të përjetshëm për “Masakrën e Lushnjes”, ndërkohë që pas ekstradimit nga Greqia do të gjykohet veçmas edhe si drejtues i një grupi kriminal që ka kryer 17 ngjarje të rënda kriminale në vendin tonë, që u rrëfyen nga bashkëpunëtori i drejtësisë Artan Tafani.
SPAK dyshon se Laert Haxhiu gjatë qëndrimit në burgun e Drenovës ka patur komunikime me elementë kriminalë duke vijuar aktivitetin edhe nga qelia. Po ashtu, kjo mund të jetë nje arsye që për Haxhiun të kërkohet izolimi i tij në regjimin e ashpër 41 Biss.
Haxhiu përshkruhet nga Tafani si personazh të cilit edhe shokët e tij ia kishin frikën dhe shpesh ankoheshin se i fuste në telashe. Gjatë dëshmisë së tij në GJKKO, i penduari i drejtësisë përfshiu edhe Qamil Haxhiun, babain e të dënuarit si një prej personave që u kishte dërguar paratë si shpërblim për një vrasje të urdhëruar nga një i njohur i Laert Haxhiut. Versus.al
