Një ngjarje e rëndë ka tronditur lagjen nr. 4 në qytetin e Korçës, ku një 60 vjeçar me inicialet P. S., është gjetur i pajetë brenda banesës së tij.
Burime paraprake bëjnë me dije se viktima dyshohet të ketë ndërruar jetë disa muaj më parë, ndërsa trupi është zbuluar vetëm sot në një gjendje të avancuar dekompozimi.
Autoritetet u njoftuan nga fqinjët, të cilët vunë re mungesën e gjatë të banorit dhe erën e fortë që vinte nga banesa.
Rrethanat e vdekjes mbeten të paqarta ndërsa trupi i pajetë është dërguar për ekspertizë mjeko-ligjore, që do të përcaktojë shkakun dhe kohën e saktë të ndarjes nga jeta.
Vëllai i viktimës jashtë kamerave ka thënë për News24 se 60-vjeçari jetonte i vetëm dhe se nuk kishte telefon ndaj nuk komunikonin.
“Vëllai im prej dhjetorit nuk ishte parë nga komshinjtë, unë skam pasur komunikim me vëllain se jetoj në Tiranë dhe merrem me punë, tani që mora lejen e zakonshme erdha të shoh shtëpinë se e kemi të dy me vëllain. Kur erdha e gjeta të pajetë. Vëllai im nuk ka telefon ndaj nuk komunikonim. Ai ishte i ndarë nga bashkëshortja. Ka dy fëmijë e bija jeton jashtë shtetit ndërsa i biri jeton në Tiranë. Tani e lajmërova dhe u nis për këtu. Vuante nga zemra dhe trajtohej me kemp”, tha ai./Versus.al
