Resorti “Saint Michelle Camping Hotel” në Shetaj të Ishmit, në pronësi të ish-kreut të Inspektoriatit të Mbrojtjes së Territorit (IMT), Ardian Halili, do të shembet pasditen e sotme me lëndë plasëse. Objekti, i cili përfshin pishina, ambiente luksoze dhe struktura banimi, rezulton të jetë ndërtuar pa leje gjatë kohës kur Halili ushtronte detyrën.
Autoritetet zbuluan shkeljet në gusht të këtij viti, ndërsa hetimet janë shtrirë edhe pranë zyrave të Kadastrës, pasi dyshohet se i gjithë kompleksi është ngritur në paligjshmëri. Fillimisht, policia raportoi vetëm për disa shtëpi pushimi të ndërtuara pa leje, por hetimet kanë nxjerrë në dritë përmasat e plota të resortit.
Tre ditë më parë, Halili u arrestua nga Policia e Durrësit. Ai kishte qenë i komanduar në krye të IMT-së për rreth tre vite, nga viti 2018 deri në prill 2021, kur u largua nga detyra. Vetë Halili ka deklaruar se kontrata e tij ishte ndërprerë nga Bashkia në mars të atij viti, ndërsa institucioni vendor ka sqaruar se largimi erdhi pas dorëheqjes së tij.
Ndërkohë, procesi i shembjes së resortit do të kryhet sot në prani të forcave të rendit dhe strukturave përgjegjëse.
