Gjykata e Posaçme ka vendosur të lërë në fuqi masën e sigurisë “arrest në burg” të caktuar më herët në mungesë për shtetasin Sajmir Kolaveri, i cili u ekstradua një ditë më parë nga Italia drejt Shqipërisë.
Kolaveri ishte shpallur në kërkim ndërkombëtar për dyshimet se është i përfshirë në ngjarjen e rëndë të ndodhur në vitin 2020 në Burrel, e cila lidhet me vrasjen dhe zhdukjen e kufomës së shtetasit Klevis Lleshi.
Sipas dosjes hetimore, ndaj tij rëndojnë disa akuza të rënda, përfshirë “vrasje për gjakmarrje”, “fshehja ose asgjësimi i kufomës”, “grup i strukturuar kriminal”, “kryerja e veprave penale nga grupi i strukturuar kriminal” dhe “organizata kriminale”.
Kolaveri dyshohet gjithashtu se ka lidhje familjare me Aurel Hoxhën, i shpallur gjithashtu në kërkim nga autoritetet shqiptare si i dyshuar për porositjen e vrasjes së Klevis Lleshit.
Gjatë seancës në Gjykatën e Posaçme, Kolaveri ka mohuar akuzat ndaj tij, duke deklaruar se nuk ka asnjë lidhje me ngjarjen.
Pas shqyrtimit të materialeve të paraqitura nga prokuroria, gjykata vendosi të konfirmojë masën e sigurisë “arrest në burg”, ndërsa hetimet për çështjen vijojnë. Versus.al
