Një ngjarje e rëndë ka ndodhur mbrëmjen e së shtunës në zonën Via Cattaneo, në një qytet të Italisë, ku një adoleshent shqiptar 16-vjeç ka mbetur i plagosur rëndë me thikë në kraharor, pas një përplasjeje të dhunshme me një bashkëmoshatar.
Sipas burimeve paraprake nga autoritetet italiane, një nga pistat kryesore që po hetohet është ajo e një tentative grabitjeje që ka degjeneruar në dhunë. Motivet e sakta të ngjarjes mbeten ende të paqarta, ndërkohë që policia po shqyrton edhe pista të tjera.
I riu shqiptar, i përshkruar si një djalë me shtat të fuqishëm, rreth 1.90 metra i gjatë dhe 80 kilogramë peshë, është transportuar menjëherë në spital, ku ndodhet i shtruar në repartin e terapisë intensive pediatrike. Ai është futur me kod të kuq, por fatmirësisht ndodhet jashtë rrezikut për jetën.
Hetuesit kanë nisur një punë intensive për zbardhjen e plotë të ngjarjes. Pavarësisht përpjekjeve të policisë, viktima ka treguar ngurrim për të bashkëpunuar, duke mos ofruar informacion të mjaftueshëm për autorin apo rrethanat e incidentit.
Në vendngjarje janë sekuestruar pamje të kamerave të sigurisë dhe po mblidhen dëshmi nga persona të pranishëm në zonë, me qëllim identifikimin e autorit.
Ngjarja ka tronditur komunitetin lokal dhe ka ringjallur debatin për sigurinë e të miturve dhe rritjen e akteve të dhunës mes të rinjve.
