Gjykata e Dibrës ka caktuar masën e sigurisë “arrest me burg” për Fatjon Bushgjokën dhe Petrit Çakrrin, të dyshuar si autorë të vrasjes së 23-vjeçarit Renis Dobra.
Ndërkohë, për këtë ngjarje të rëndë janë shpallur në kërkim edhe dy vëllezërit e Fatjon Bushgjokës, Kristi dhe Aleksandër Bushgjoka, të cilët dyshohet se janë larguar nga Shqipëria pas krimit.
Zbardhja e ngjarjes erdhi më 16 korrik, kur u ndaluan dy të dyshuarit e parë. Megjithëse deklaratat e tyre para hetuesve kanë qenë kontradiktore, janë pikërisht kamerat e sigurisë përgjatë aksit Burrel-Tiranë që kanë ndihmuar në identifikimin e tyre.
Pamjet filmike kanë dokumentuar momentin kur 55-vjeçari dhe tre vëllezërit Bushgjoka janë parë së bashku duke konsumuar kafe pranë një karburanti, vetëm pak orë para vrasjes.
Pas këtij takimi, katër personat e dyshuar kanë udhëtuar me dy automjete — një “Range Rover” të zi dhe një “Hyundai Santa Fe” — nga Burreli drejt fshatit Zenisht, ku ndodhi krimi.
