Orët e vona të mbrëmjes u shoqëruan me stuhi dhe rrebeshe shiu, duke shkaktuar vërshime në rrugë dhe rrëshqitje masive të gurëve dhe inerteve.
Rruga Kukës-Shishtavec u bllokua gjatë natës pas rrëshqitjes së një masivi gurësh që ranë nga skarpatet anësore, në afërsi të fshatit Lojmë. Fatmirësisht, në momentin e rrëshqitjes nuk pati qarkullim mjetesh apo qytetarësh.
Kompania sipërmarrëse ka nisur punën për largimin e gurëve nga rruga dhe sigurimin e skarpatit nga rrëshqitje të tjera të mundshme.
Në lartësitë mbi 700 metra mbi nivelin e detit, reshjet e shiut u kthyen në reshje dëbore, ndërsa temperaturat ranë ndjeshëm. Energjia elektrike është ndërprerë në shumë zona të Kukësit, Hasit dhe Tropojës, për të cilat po punohet nga grupet e punës të OSHEE-së.
Nga informacioni i marrë nga KMC, mësohet se në territorin e Kukësit dhe Hasit kanë vazhduar reshje të dobëta bore, ku në Shishtavec trashësia arrin deri në 3 cm. Ndërkohë, deri në këto momente, nuk ka reshje bore në zona të tjera.
Aktualisht, të gjitha akset rrugore kombëtare janë të qarkullueshme normalisht, përfshirë edhe Rrugën e Kombit. Nga bashkitë Kukës, Has dhe Tropojë, nuk ka raportime për ndonjë problematikë emergjente.
I gjithë Qarku i Kukësit furnizohet normalisht me energji elektrike, përveç Nj. Adm. Kolsh, Surroj, Arrën dhe Malzi; fshatrat Topojan, Breki dhe Xhaferaj (Nj. Adm. Topojan, Bashkia Kukës); Nj. Adm. Lekbibaj, Bujan, Llugaj, Bytyç, Fierzë, Margegaj dhe Tropojë (Bashkia Tropojë); si dhe fshatrat Perollaj, Bardhaj, Helshan dhe Kosturr (Nj. Adm. Golaj, Bashkia Has).
Në Shkodër, në akset e Lotit 1, H. Hotit – Tamare, Tamare – Vermosh dhe Bogë – Theth, gjatë natës ka patur reshje shiu me intensitet të lartë, që kanë shkaktuar rënie gurësh dhe dalje të shumta inertesh.
Dalje inertesh ka pasur në aksin Tamare – Vermosh, në zonën e quajtur Dobrinje. Është punuar me mjete dhe fuqi punëtore për të larguar inertet nga karrexhata.
Në aksin Bogë – Theth, në orët e vona të natës, reshjet e shiut janë kthyer në reshje bore. Është punuar gjatë natës për pastrimin e borës dhe në mëngjes, me rënien e temperaturave, është bërë kriposja e akseve rrugore.
Aktualisht, moti është përmirësuar, por ka rënie temperaturash. Mjetet dhe makineritë janë në terren në gatishmëri duke monitoruar situatën.
Ndërkaq në rajonin juglindor, moti i keq dhe me erë të fortë gjatë orëve të natës ka shkaktuar thyerje pemësh në parkun ujor të Drilonit në Pogradec.
Kjo nuk është hera e parë që pemë të vjetra në këtë zonë rrëzohen nga era ashtu si më herët ka pasur të tilla edhe në parkun e qytetit.
Pas verifikimeve, ndërmarrja e parqeve ka nisur largimin e tyre, ndërsa po kontrollon edhe nëse ka pemë të tjera në rrezik thyerje si pasojë e moshës së tyre të madhe.
Era e fortë në 48 orët e fundit ka shkaktuar edhe mungesë energjie në disa fshatra të thellë të Gorës dhe Mokrës ku problemet me përcjellsat kamë qenë evidente ndërsa është dashur ndërhyrja e grupeve të OSHEE për të normalizuar situatën.
