Julian Meçaj është lënë në arrest me burg në seancën gjyqësore të mbajtur sot në Gjykatën e Posaçme. Ndaj tij rëndon akuza e organizimit të atentatit ndaj ish-prokurorit të Durrësit Arjan Ndoji, ku mbeti i vdekur shoferi i këtij të fundit, Andi Maloku.
Meçaj u ekstradua në gusht nga Dubai së bashku me Plarent Dervishajn, të dy të akuzuar për të njëjtën ngjarje kriminale, ndërsa të dy njihen si ish-anëtarë të bandës së Durrësit.
Përveç atentatit ndaj ish-prokurorit Ndoji, Meçaj akuzohet edhe për tentativën e vrasjes së Pëllumb Muharremit i njohur ndryshe si "Rrumi i Shijakut" i cili udhëtonte me prokurorin në të njëjtën makinë.
Meçaj dhe Plarent Dervishaj u ekstraduan nga Dubai në mënyrë të papritur, pa vendimin e një gjykate. Kjo për shkak se të dy ishin përfshirë në një përplasje fizike me persona të tjerë dhe pretendohej se u rrezikohej jeta. Me t'u kthyer në Shqipëri, Julian Meçaj pretendoi para gjyqtarëve se kishte ardhur vullnetarisht të përballej me akuzat që rëndojnë ndaj tij. Ndërsa Dervishaj e cilësoi transportimin e tij drejt Shqipërisë si një rrëmbim. Versus.al
