Ditën e sotme, Elona Bregu, një nënë 40 vjeçare e cila ka edhe një vajzë të sëmurë, kërcënoi se do të hidhej nga kulla e oksigjenit të ish-Uzinës në Kuçovë sepse kompania e pastrimit ku ajo punonte “Viola Green” e kishte pushuar nga puna sepse kishte kërkuar 2 pagat e fundit.
Elona dhe koleget e saj kishin shkuar të kërkonin informacion në bashki për rrogën mujore 38 mijë lekëshe të cilën nuk e merrnin prej 2 muajsh e gjysmë, por u njoftuan se ishin pushuar nga puna për shkak të ankesave.
‘Viola Green’ rezulton të jetë ndër kompanitë kryesore që kanë fituar më së shumti tendera nga bashkitë e Shqipërisë. Pronari i saj është Marsel alias Bujar Shega i cili u arrestua në Milano në 2024-ën kur u godit banda e të shumëkërkuarit Suel Çela.
Ndaj Shegës rëndojnë disa vepra penale nga trafiku ndërkombëtar dhe pastrimi i parave tek grupi kriminal. GJKKO e la në burg pas ekstradimit nga Italia.
Bujar Shega i cili është aksioneri kryesor i kësaj kompanie, pastronte paratë e grupit kriminal të Suel Çelës. Dy javë pas arrestimit të Marsel Shegës, administrator i kompanisë “Viola Green” u zgjodh Sherif Kapllani, i cili është edhe aksioner me 33%.
Çfarë është një kontrast i madh në këtë rast është fakti sesi një kompani që ka përfituar dhjetëra milionë euro tendera në 5 bashki të vendit, Kuçovë, Prrenjas, Cërrik, Elbasan dhe Peqin, nuk paguan për muaj të tërë punonjëset e pastrimit. Të dhënat në “Open Corporates” tregojnë se kjo kompani ka fituar 10 tendera në këto 5 bashki me vlerë që e tejkalon shumën prej 7.5 miliardë lekë të vjetra. Versus.al
