Agjencia e Mbikëqyrjes Policore ka kallëzuar në prokurorinë e Shkodrës disa efektivë policie duke i akuzuar për shpërdorim detyre në masakrën e ndodhur pasditen e 30 tetorit ku u ekzekutuan me breshëri plumbash Hamza Lici e Arlind Bushati dhe çifti i bashkëshortëve Flutura dhe Bashkim Basha që u përplasën nga mjeti i viktimave.
Efektivët akuzohen se kanë lënë të ikte personin "misterioz" i cili u shfaq në një video pas masakrës së ndodhur ndërsa më pas humbi gjurmët. Dyshimet e deritanishme janë se personi i tretë ka qenë në makinë me viktimat, madje dyshohet se ka qenë vetë i shumëkërkuari Ibrahim Lici.
Prokuroria e Shkodrës ditë më parë shpalli moskompetencën, duke ia kaluar SPAK-ut hetimet për zbardhjen e ngjarjes që tronditi gjithë vendin. Duke parë ngjashmërinë që ka personi në video me fotot e publikuara më herët të Ibrahim Licit, dyshohet se ky i fundit ka hyrë në vend fshehurazi nga Turqia ndërsa policia ka kryer kontrolle në disa klinika private pasi ka informacione se personi i tretë është plagosur me 2 plumba. Versus.al
