Një incident i rëndë ka ndodhur mbrëmjen e sotme në një lokal në lagjen nr.4 të qytetit të Korçës, ku një 37-vjeçar mbeti i plagosur me thikë në krah nga një adoleshent 17-vjeç.
Sipas burimeve policore dhe hetimeve paraprake, autori i dyshuar është shtetasi P.K., 17 vjeç, ndërsa i plagosuri është Benard Qelemeni, rreth 37-vjeç, banues në Korçë por me banim të mëparshëm në Greqi.
Konflikti ka zanafillën rreth dy vite më parë: dyshohet se Benard Qelemeni kishte vjedhur banesën e familjes së 17-vjeçarit.
Pak ditë më parë i plagosuri kishte kthyer në Shqipëri dhe, pasi adoleshenti e pa në lokal, ka nisur një debat që shpejt u përshkallëzua.
Fillimisht, sipas detajeve, Benard Qelemeni ka goditur i pari 17-vjeçarin, por ky i fundit ka reaguar duke nxjerrë thikën dhe duke e plagosur në pjesën e krahut.
I plagosuri ndodhet aktualisht në spitalin e Korçës, jashtë rrezikut për jetën.
17-vjeçari u largua nga vendi i ngjarjes, por forcat e policisë e kapën dhe e shoqëruan në komisariat vetëm pak minuta më vonë. Grupi hetimor, në bashkëpunim me Prokurorinë, po punon për dokumentimin e plotë të rrethanave dhe zbardhjen e dinamikës së saktë.
Policia e Korçës ka konfirmuar se ngjarja dyshohet të ketë lidhje me hakmarrje për vjedhjen e vjetër të banesës./Versus.al
