Dëshmi rrënqethëse vijnë nga pacientë të spitalit Onkologjik në Tiranë, ku mungesa e ilaçeve kryesore po i çon drejt vdekjes.
Gazetari Osman Stafa ka denoncuar situatën e rëndë brenda këtij spitali të sëmundjeve të rënda, ku sipas pohimit të pacientëve janë të paktën dy ilaçe kryesore që mungojnë dhe për pasojë, sëmundja e kancerit brenda pacientëve që trajtohen, po avancon pa ndalim.
‘Sapo mbylla telefonin nga një bisedë e gjatë që zhvillova me një pacient të Onkologjikut.
Eshtë skandaloze ajo që po ndodh aktualisht aty. Prej 5 ditësh mungon ilaçi kimio ‘mesna’.
Mesna duhet të merret me medikamentin ‘ifosfamid’.
Ifosfamidi përdoret në limfoma, kancer të mushkërive dhe sarkoma. Nuk mund të jepet ifosfamidi, i pashoqëruar me mesna. Pacientë kanë mbetur pa këtë trajtim’, shkruan gazetari Stafa, sipas bisedës që ka bërë me pacientët që kërkojnë të trajtohen me ilaçin e domosdoshëm.
Por jo vetëm kaq.
Përveç ‘mesna’ mungon edhe një tjetër ilaç po kaq i rëndësishëm. Bëhet fjalë për ‘vinblastinë’, një tjetër medikament mjaft i rëndësishëm në trajtimin e kancerit të mushkërisë, fshikëzës, trurit etj.
‘Sikur të mos mjaftonte kjo, mungesave i është shtuar edhe ‘vinblastinë’. Një tjetër medikament shumë i rëndësishëm në trajtimin e kancerit. Përdoret së bashku me medikamente të tjera, për të trajtuar disa lloje të kancerit, ku përfshihet limfoma ‘Hodgkin’, kanceri i mushkërive, kanceri i fshikëzës, kanceri i trurit, melanoma dhe kanceri testikular’, shkruan gazetari Osman Stafa.
Kudo që kanë pyetur pacientët, kanë marrë vetëm një përgjigje: është në mungesë.
Pasi kanë shkuar në drejtorinë Farmacinë Qendrore të QSUT-së, askush nuk i ka pritur aty, duke mos u dhënë as shpresë, por duke i lënë të ikin pa e kthyer kokën pas, por pacientët nuk janë dorëzuar. Ata kanë vazhduar të kërkojnë ilaçet që u duhen, por askund nuk i kanë gjetur.
‘Është mungesë.- shkruan gazetari Stafa në denoncimin publik të tij. - Pacientët janë duke kontrolluar farmacitë e gjithë Tiranës në mos e gjejnë, pasi e kanë urgjente. Protokolli i tyre, u thotë që këto ilaçe duhet t’i kishin bërë, ndërsa po humbasin kohë të çmuar.
Moszbatimi i protokollit, çon në regres. Kuptojeni. Kanceri avacon, përhapet, dhe nuk ke më mundësi ta mundësh.
Shkojnë pacientët në Farmacinë Qëndrore për të takuar drejtoreshën e për të mësuar mbi fatin e medikamenteve të tyre, dhe nuk i pret askush. Askush që t’i sqarojë. I kthejnë mbrapsht të gjithë.
Të pashpresë largohen. Të pashpresë. Nuk kanë çfarë bëjnë përballë shtetit, që as i plas se çfarë ndodh me ta’.
E në fund edhe mesazhi më i dhimbshëm i pacientit i cili në pamundësi të gjejë ilaçin që i duhet patjetër që të kurohet, ka marrë rrugën e shtëpisë, duke e ditur se, ajo rrugë kishte vetëm një destinacion, mungesa e trajtimit me ilaçe të çon në humbjen e jetës, më shpejt seç duhet.
‘A keni ndërgjegje? A keni zemër? A keni shpirt? Si mund t’i lini ata njerëz ashtu?
Në lot ishte pacienti në fjalë, ku pasi kishte kontrolluar gjithë Tiranën për ilaçin që i duhet, së bashku me familjarët, është dorëzuar dhe po ikën në shtëpi. ‘Po iki në shtëpi duke ditur se kanceri po avancon brenda trupit tim, e kjo për faj të këtij qelbësirë shteti, që nuk më siguron kimiot’, është apeli i pacientit që nuk siguron dot jetën e tij.
Gazetari Osman Stafa ka dhe një thirrje për kryeministrin dhe ministren e Shëndetësisë.
‘Albana Koçiu a është iluzion kjo çfarë shkruaj? A është e vërtetë e marrë aty këtu?
Edi Rama a është krim kundër njerëzimit t'i lësh të sëmurët me kancer pa kimio?’, shkruan në denoncimin e tij publik, gazetari Osman Stafa, me shpresën se institucionet do të lëvizin dhe të sigurojnë ilaçet aq shumë të domosdoshme për pacientët e sëmurë me kancer.
Vetëm një ditë më parë, Gjykata e Apelit vendosi përfundimisht që të mos nisin hetimet për mungesën e kimioneve për fëmijët, një vendim i rëndë dhe padrejtësi për pacientët e vegjël që nuk kanë mundësi tjetër që të kurohen.
