Policia e Vlorës ka zbardhur djegien e qëllimshme të një automjeti rreth një javë më parë, autor i të cilit rezultoi një 17-vjeçar që do të procedohet në gjendje të lirë për shkak të moshës.
Ndërkohë vijon puna dhe hetimet për zbardhjen e mëtejshme të ngjarjes për identifikimin e autorëve të tjerë që dyshohet se e kanë shtyrë shtetasin, Z.M të kryejë krimin.
Djegia e qëllimshme e automjetit tip ‘Benz’, është kryer në lagjen “Lirim’, Vlorë.
17-vjeçari akuzohet për veprën penale “Shkatërrimi i pronës me zjarr”.
Materialet procedurale i kaluan Prokurorisë, për veprime të mëtejshme.
Njoftimi i Policisë
Vlorë/ Zbardhet djegia e qëllimshme e një automjeti, kryer një javë më parë, në lagjen “Lirim”.
Procedohet në gjendje të lirë, për shkak të moshës, autori i dyshuar, një shtetas 17 vjeç.
Vijon puna për identifikimin e shtetasve të tjerë të përfshirë në këtë rast, të cilët dyshohet se kanë nxitur 17-vjeçarin në këtë krim.
Si rezultat i informacioneve dhe provave të siguruara gjatë një hetimi të ndjekur me metoda proaktive, në bashkëpunim me Prokurorinë e Vlorës, u mundësua zbardhja e djegies së qëllimshme të automjetit tip “Benz”, në përdorim nga shtetasi S. P., 19 vjeç, kryer në lagjen “Lirim”, mbrëmjen e datës 05.08.2024.
Në përfundim të veprimeve hetimore specialistët për Hetimin e Krimeve të Komisariatit të Policisë Vlorë referuan materialet në Prokurori, ku nisi procedimi në gjendje të lirë, për shkak të moshës, për autorin e dyshuar të rastit, shtetasin Z. M., 17 vjeç, banues në Vlorë, për veprën penale “Shkatërrimi i pronës me zjarr”.
Në drejtimin e Prokurorisë, vijon puna për identifikimin e shtetasve të tjerë të përfshirë në këtë rast, të cilët dyshohet se kanë nxitur 17-vjeçarin për të djegur këtë automjet.
Materialet procedurale i kaluan Prokurorisë, për veprime të mëtejshme./ Versus.al
