Pa mbushur as 24 orë nga hyrja e vitit 2026, Shqipëria është tronditur nga një seri ngjarjesh tragjike.
Vetëm gjatë dy ditëve të fundit, 7 persona kanë humbur jetën dhe dhjetra të tjerë kanë mbetur të plagosur në aksidente rrugore dhe raste të dhunës familjare.
Festimet e Vitit të Ri morën kthesën më të errët në aksin Gjirokastër–Tepelenë, ku tre të rinj humbën jetën pas një përplasje të tmerrshme mes një Volksëagen dhe një Mercedes-Benz.
Dy të rinjtë, Klejdi Myftari 24 vjeç dhe Anxhelo Ruçi 27 vjeç, vdiqën në vend, ndërsa drejtuesi i Mercedes-it, Martin Dulaj 25 vjeç, nuk ia doli të mbijetonte.
Pasagjerja 19-vjeçare, Arsida Demiri, mbeti e plagosur rëndë dhe u transportua me urgjencë në Spitalin e Traumës në Tiranë, në gjendje kritike.
Tragjedia u përsërit mëngjesin e sotëm në aksin Lezhë–Shkodër, pranë fshatit Gocaj. Një tjetër përplasje mes dy automjeteve la pas dy viktima: Elona dhe Petrit Florini, bashkëshortë. Tre të tjerë, përfshirë një nënë me dy fëmijë të mitur, mbetën të plagosur, megjithëse jashtë rrezikut për jetën.
Ngjarja më e rëndë e këtyre dy ditëve ndodhi mesditën e sotme në Orikum, ku Llogora Xhebro vrau gruan e tij, Sose Xhebron, dhe më pas i dha fund jetës. Çifti, që kishte filluar procedurat e divorcit dhe nuk jetonte së bashku prej dy muajsh, përshkallëzoi konfliktet e gjatë gjatë periudhës së festave.
Sose Xhebro ishte kthyer nga Italia për të kaluar pushimet e fundvitit, por kthimi u shoqërua me tensione që përfunduan tragjikisht.
Hetimet e grupit hetimor po vazhdojnë intensivisht, ndërsa autoritetet mbledhin dëshmi nga familjarë dhe persona të afërt për të kuptuar rrethanat që çuan në vrasjen dhe vetëvrasjen e çiftit.
Viti i Ri nuk solli vetëm festë, por edhe problemet e vjetra që nuk u zgjidhën: aksidente tragjike, konflikte të pazgjidhura dhe dhuna në familje vazhduan të shkaktojnë humbje jete dhe shqetësim për qytetarët. Dy ditët e para të 2026-s tregojnë se sfidat e mëdha mbeten të pranishme dhe kërkojnë vëmendje urgjente nga të gjithë./ Versus.al
Gjykata e Posaçme kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për tre nga të arrestuarit në kuadër të megaoperacionit të SPAK për goditjen e trafikut ndërkombëtar të drogës dhe pastrimit të parave.
Në seancën për vlerësimin e masave të sigurisë, gjykata vendosi të mbajë në burg Orest Sotën, Orgest Birçajn dhe Dritan Agën. Ndërkohë, për Gëzim Islamin u vendos lirimi për arsye shëndetësore kundrejt një garancie pasurore prej 100 mijë eurosh.
Katër të arrestuarit dolën para Gjykatës së Posaçme këtë të shtunë, ndërsa seanca nisi në orën 09:00. Procesi u ndërpre për rreth dy orë pas kërkesës së avokatëve mbrojtës, të cilët kërkuan kohë për t’u njohur me aktet hetimore të dosjes.
Pas rifillimit të gjykimit, trupa gjykuese shqyrtoi kërkesat e palëve dhe vendosi masat e sigurisë për secilin prej të dyshuarve.
Në sallëne gjyqit ishin të pranishëm kreu i SPAK, Altin Dumani, prokurorja Elida Kaçkini dhe gjyqtarja Flojera Davidhi.
Megaoperacioni i SPAK ka në fokus goditjen e grupeve të përfshira në trafikun ndërkombëtar të narkotikëve dhe skemat e dyshuara të pastrimit të parave përmes investimeve në sektorin e ndërtimit. Hetimet për këtë çështje vijojnë.Versus.al
