Procesi i votimit nga jashtë kufijve të Shqipërisë ka nisur zyrtarisht sot, duke shënuar një moment historik për përfshirjen e qytetarëve shqiptarë që jetojnë jashtë vendit në zgjedhjet e 11 Majit 2025. Lajmi u bë i ditur nga Komisioneri Shtetëror i Zgjedhjeve, Ilirjan Celibashi, përmes një postimi në rrjetet sociale.
Sipas Celibashit, qytetari i parë që ka përfituar nga kjo mundësi është një zgjedhës me banim në Erlangen, Gjermani, i cili është i regjistruar si votues në qarkun e Dibrës. Ai ka marrë fletën e votimit nga KQZ në orën 07:15 të mëngjesit të sotëm.
“Kjo është një arritje e madhe për përfshirjen e qytetarëve shqiptarë jashtë vendit në procesin demokratik,” shkruan Celibashi, duke theksuar rëndësinë e këtij hapi për garantimin e një përfaqësimi sa më gjithëpërfshirës.
Votimi nga jashtë është një nga reformat më të rëndësishme në sistemin zgjedhor shqiptar, që synon të afrojë diasporën me zhvillimet politike dhe shoqërore në vend. Me këtë hap, mijëra shqiptarë që jetojnë në vende të ndryshme të botës do të kenë mundësinë të shprehin vullnetin e tyre në zgjedhjet e ardhshme.
Ky proces pritet të vijojë në ditët në vijim, me përgatitje dhe mbikëqyrje të vazhdueshme nga Komisioni Qendror i Zgjedhjeve, për të siguruar një proces transparent dhe të besueshëm. /Versus.al/
