Pritja për publikimin e statistikave të Censit të Popullsisë 2023, ka marrë fund sot teksa drejtoresha e INSTAT, Elsa Dhuli publikoi shifrat e banorëve që jetojnë në Shqipëri.
Në gjithë vendin, jetojnë 2 milionë e 402.113 banorë. Në total, Shqipëria ka 755.950 familje me numër mesatar prej 3.2 anëtarësh në një familje. Banorët jetojnë në 1.082.529 banesa të zakonshme.
Bazuar në shifrat e publikuara sot, numri i popullsisë rezidente në Shqipëri ka pësuar një rënie prej 419.831 banorësh krahasuar me censin e vitit 2011. Pavarësisht pritshmërive për rënien drastike të banorëve të vendit, për shkak të emigracionit masiv, një rënie e tillë e banorëve në vend paraqet një alarm për tkurrjen demografike dhe plakjen e popullisë së Shqipërisë.
Në kuadër të të dhënave të publikuara, janë publikuar edhe shifrat për arsimin e banorëve që jetojnë në Shqipëri, statusin martesor si dhe shpërndarjen e demografisë në qytete të ndryshme.
32% e popullsisë jeton në qytetin e Tiranës. Pas Tiranës vijnë Elbasani dhe Fieri me nga 10%.
Tiranë: 32% e popullsisë
Fier :10%
Elbasan: 10%
Durrës: 9%
Korçë: 7%
Shkodër, Vlorë, Berat me nga 6%
Dibër dhe Lezhë me nga 4%
Kukës: 3%
Gjirokastër: 3%
Arsimi i popullsisë:
12.655 banorë janë vetëm me Arsim Fillor
871.110 banorë me arsim 7/8/9 vjeçar
683.400 banorë me arsim të mesëm
192.224 me arsim të të Lartë
204.086 me Master
Statusi martesor
54.9% të martuar
36.6% beqarë
7% të ve
1.4% të divorcuar.
Vonesa e daljes së rezultateve të censit të popullisë dhe banesave që u zhvillua gjatë muajit nëntor të vitit të kaluar, solli pretendime dhe akuza mes palëve politike për manipulime. Jo më larg se dje, ish-kryeministri Sali Berisha akuzoi kryeministrin Edi Rama se shtyu publikimin e rezultateve të censit për të manipuluar shifrat e banorëve që jetojnë aktualisht në Shqipëri.
Ai tha se Shqipëria është i vetmi vend në rajon ku shifrat e censit të popullsisë publikohen pas nëntë muajve ndërkohë që Kosova me të njëjtën metodë të mbledhjes të të dhënave i ka publikuar ato brenda ditës. Sipas Berishës, Rama përpiqet të fshehë largimin masiv të shqiptarëve si pasojë e keqqeverisjes së socialistëve për 3 mandate radhazi. Versus.al
