Një specie e rrezikshme peshku, e njohur si peshku-glob me kokë lepuri (Lagocephalus sceleratus), po përhapet me shpejtësi në Detin Mesdhe, duke ngritur shqetësime si për pushuesit ashtu edhe për peshkatarët. Pas disa incidenteve në plazhet e Greqisë, ku notarët janë kafshuar nga ky peshk, Kryqi i Kuq Grek ka publikuar udhëzime zyrtare për ndihmën e parë dhe masat që duhet të marrin turistët.
Peshku Lagocephalus sceleratus është me origjinë nga Oqeani Indian dhe Paqësori, por hyri në Mesdhe përmes Kanalit të Suezit. Ai u identifikua për herë të parë në ujërat greke në vitin 2005 dhe, që atëherë, është shumuar me ritme shumë të shpejta, ndërsa ka shumë pak grabitqarë natyrorë.
Sot kjo specie gjendet në mënyrë të përhershme rreth ishullit të Kretës, në Gjirin Saronik, pranë ishujve të Dodekanezit, si edhe përgjatë bregdetit të Athinës, duke krijuar probleme jo vetëm për ekosistemin detar, por edhe për pushuesit.
Kafshime të rënda dhe plagë të hapura
Edhe pse konsumimi i këtij peshku mund të jetë vdekjeprurës për shkak të tetrodotoksinës, një neurotoksinë shumë e fuqishme, rreziku më i madh për notarët vjen nga kafshimi i tij.
Kafshimi nuk është helmues, por nofullat jashtëzakonisht të forta të peshkut mund të shkaktojnë plagë të thella, të hapura dhe me gjakderdhje.
Biologët detarë paralajmërojnë se kjo specie po bëhet gjithnjë e më agresive. Sipas tyre, peshqit tashmë lëvizin më shpesh në grupe dhe nuk kanë më frikë nga prania e njerëzve.
Sipas mediave greke, muajt e fundit disa persona janë dërguar në spital pas sulmeve nga ky peshk. Një nga rastet më të njohura është ai i një gruaje të moshuar, e cila u kafshua në zonën bregdetare të Varkizës, pranë Athinës. Në shumicën e rasteve, kafshimet prekin këmbët e pushuesve.
Çfarë rekomandon Kryqi i Kuq?
Kryqi i Kuq këshillon që çdo person i kafshuar nga ky peshk të:
- shpëlajë menjëherë plagën me ujë të pastër dhe sapun;
- kërkojë ndihmë mjekësore për pastrimin dhe qepjen e plagës, nëse është e nevojshme;
- kontrollojë nëse duhet të vaksinohet kundër tetanozit;
telefonojë menjëherë numrin e emergjencës në rast gjakderdhjeje të madhe.
Ekspertët: Nuk ka arsye për panik
Anastasia Miliou, përfaqësuese e Institutit Grek për Mbrojtjen e Mjedisit Detar, thotë se situata nuk duhet të shkaktojë panik.
"Problemi prek kryesisht sektorin e peshkimit. Për notarët mendoj se reagimet janë disi të ekzagjeruara. Në 99.5% të vijës bregdetare nuk ka asnjë problem," deklaroi ajo për median greke inNewspaper.
Dëm i madh për peshkatarët
Përveç rrezikut për njerëzit, peshku-glob po shkakton dëme të konsiderueshme në industrinë e peshkimit. Ai shqyen rrjetat dhe ushqehet me peshqit që kapen për treg.
Për të frenuar përhapjen e tij, autoritetet greke kanë vendosur të subvencionojnë peshkatarët me 6 euro për çdo kilogram peshku-glob të kapur. Skema të ngjashme shpërblimi zbatohen tashmë edhe në Qipro, ku paguhen 4.80 euro për kilogram, si dhe në Turqi.
Ekspertët u bëjnë thirrje pushuesve të jenë të kujdesshëm gjatë notit, sidomos në zonat ku është raportuar prania e kësaj specieje, por theksojnë se nuk ka arsye për alarm, pasi rastet e sulmeve mbeten të rralla.
