Çfarë do të gjeni në brendësi
*Kryeministri Edi Rama mbajti sot komunikimin “direkt” të radhës me ndjekësit në rrjetet sociale duke u kthyer përgjigjie pyetjeve të ndryshme të drejtuara ndaj tij. *Duke e nisur me komentet ku një qytetar i ankohej se nuk kishte bukë për të ngrënë, Rama tha se vendi nuk ndodhet në atë situatë dhe se flitet për standarte. *Më tej foli edhe për pensionet duke thënë se synon që deri në 2030-ën, ta çojë pensionin minimal në 200 euro. *Nuk la pa ironizuar as kryedemokratin Sali Berisha për të cilin tha se “ka rjedhur” dhe e etiketoi sërish me fjalët “buf kënete”. Ndërsa theksoi vazhdimisht se pavarësisht të gjitha problemeve rëndësi aktuale ka anëtarësimi në Bashkimin Europian.
Pensioni minimal, Rama: Synojmë që ta çojmë 200 euro deri në 2030-ën
Kryeministri Edi Rama ka deklaruar se synon që deri në 2030-ën, pensioni minimal të ketë arritur në shifrën 200 euro, ndërsa ai mesatar 400 euro.
Teksa iu përgjigj një komentuesi në rrjetet sociale, Rama tha se nuk ka një rrugë më të lehtë aktualisht dhe se deri në realizimin e këtij synimi, pensionistët do të vijojnë të marrin bonuse.
“Synojmë që deri në 2030-ën të mund të arrijmë tek pensioni minimal 200 euro. Ndërsa për ata që janë me sigurime të plota, të ketë një pension mesatar 400 euro. Kjo është rruga. Ndërsa rruga për të cilën flet ti është rruga e katastrofës. Ndërkohë e përsëris që pensionistët po marrin bonuse domethënëse në raport me të shkuarën dhe do të vazhdojnë të marrin bonuse ndërkohë që ne çojmë pensionet në atë shifën minimale që thashë”- deklaroi Rama. Versus.al
Rama: Ata që thonë po vdesim për bukë, janë të mbushur me gjellë, mish e birra
Duke iu përgjigjur një komentuesi i cili shkruante se gjendja ekonomike e popullit nuk është e mirë dhe madje ka nga ata që vuajnë për bukë, kryeministri Edi Rama u shpreh se flitet për standarte dhe jo për këtë nivel varfërie.
Ndërsa ironizoi komentuesin duke thënë se të gjithë ata që ankohen për bukë, kanë fotografi në rrjetet sociale me gjellë e mish.
“Po vdesim për bukë, ke hyrë në gjynah të madh shumë keq”- shkruan komentuesi.
“Kush po vdes për bukë? Shqiptarët për bukë nuk kanë vdekur që nga koha e Skënderbeut. Nuk është çështje të vdesësh për bukë, por për ngritjen e standarteve. Është interesante se këto profilet që thonë po vdesin për bukë janë të mbushur me fotografi me gjellë, mish e birra. Nuk e kuptoj ça është kjo histori”- iu përgjigj Rama. Versus.al
“Dembel”, Rama i përgjigjet komentuesit: Këtë nuk ma kishte thënë askush, madje as Luli
Kreu i qeverisë, Edi Rama ka mbajtur sot një tjetër komunikim direkt me ndjekësit në rrjetet sociale ku iu është përgjigjur komenteve të ndryshme.
Teksa retorikën e bazoi sërish në anëtarësimin në Bashkimin Europian, Rama e nisi nga pensionet, duke thënë se në mënyrë graduale do të bëhet edhe rritja e tyre.
“Kemi thënë dhe e përsëris që pensionistët po marrin bonuse domethënese dhe gradualisht ne do të çojmë pensionet në atë minimalen që sapo thashë”- tha Rama.
Ndërsa më tej iu përgjigj edhe njërit prej komentuesve i cili e konsideronte “dembel” kryeministrin e vendit.
“Ja pra që ekzistojnë dhe është një shumicë njerëzish dhe ajo shumica ekziston që ne na voton. Të gjitha mi kanë thënë po vetëm këtë dembel nuk më kanë thënë. Madje dhe Luli më ka thënë se rri zgjuar dhe bëj punë të liga”- u përgjigj Rama. Versus.al
