Çfarë do të gjeni në brendësi
*Kryeministri Edi Rama dhe ministrja e Shëndetësisë, Albana Koçiu kanë zhvilluar sot një takim me mjekët në QSUT pas skandalit të bërë publik ditë më parë ku u zbulua sesi qyetarëve me kancer nuk u jepej shërbimi i nevojshëm dhe orientoheshin drejt klinikave private. *Koçiu e mori fjalën e para duke prezantuar edhe disa prej ndryshimeve që pritet të miratohen në ligjin për “Urdhrin e Mjekut”. Heqja e licencës përjetë për mjekët që dëmtojnë qytetarët dhe autorizimi për mjekët që do të punojnë në privat, kanë qenë ndër temat kryesor që ministrja ceku se do të ndryshohen. *Rama e quajti skandalin te Onkologjiku “krim kundër njerëzimit” dhe tha se do të merrte fund historia e orientimit të pacientëve drejt spitaleve private, ndërsa u bëri thirrje gjyqtarëve që kanë në dorë çështjen e mjekëve të përfshirë në skandal, që të mos kursehen në ndëshkimin e dhënë ndaj tyre.
“Merimangat e Onkologjikut”, Rama thirrje gjyqtarëve për ndëshkimin e mjekëve të pandehur: Mos e hani turpin me bukë
Kryeministri Edi Rama u shpreh ashpër për skandalin e zbuluar te Onkologjiku, ku qytetarët me kancer zhvateshin në klinika private ndërsa aparatura e blerë që në vitin 2021 e kobaltit nuk përdorej.
Ai pati edhe një thirrje për gjyqtarët që kanë në dorë çështjen e mjekëve të akuzuar për skandalin e rëndë, të cilëve u kërkoi që “të mos e hanë turpin me bukë”.
“U bëj thirrje gjyqtarëve që të që të mos lejojnë që relativizmi dhe banalizimi i kësaj histori banale..., siç ka ndodhur kur gjykatës të korruptuar e kanë ngrënë turpin me ryshfet dhe kanë nxjerrë vrasës. Ne do të vazhdojmë punën tonë, jo vetëm me masat që i paralajmëroi ministrja”- tha Rama.
Duke i cilësuar mjekët e vënë nën hetim si “merimangat e Onkologjikut”, Rama duke përsëritur deklaratën e ministres Koçiu për ndryshimet në ligjin për “Urdhrin e Mjekut”, tha se nuk do të ketë më drejtues të spitaleve publike të cilët do të mund të punojnë apo kenë nën pronësi një klinikë private.
“Historia e shefave të departamenteve dhe e drejtuesve të spitaleve që i shërbejnë edhe sistemit publik dhe kanë në pronë apo janë në punë edhe në shërbimin privat, është histori që e dimë shumë mirë nga vjen. Vjen nga vetë historia e kalimit nga një sistem shëndetësor i centralizuar i të shkuarës në një sistem shëndetësor ku hyri në mes kapitalizmi dhe nga mungesa e çdo baze dhe kapaciteti për të ndërtuar një sistem autonomie spitalore që u garanton mjekëve profesionistë që të mund të shpërblehen përtej tavaneve të njëjta të pagave, në bazë të performancës së tyre.
Do organizojmë një grup menaxherësh të huaj për ta asistuar nga afër drejtuesen e re të QSUT. Kush harron se është shërbëtor dhe sillen si të pashpirtë si ata që pamë, meriton ndëshkimin e Zotit lart në qiell. Mjaftojnë 5 maskarenj, si ata merimangat e Onkologjikut, që ju të goditeni nga valë revolte që është legjitime, nga një popull i tërë. Ju e keni për detyrë të shërbeni”- tha kryeministri ndër të tjera. Versus.al
Skandali tek Onkologjiku/ Rama: Të përdorësh uniformën e mjekut si maskat e grabitqarëve të bankave, krim kundër njerëzimit
Edi Rama në mbledhjen me të gjithë shefat e shërbimeve në Qendrën Spitalore Universitare Nënë Tereza” u shpreh se të përdorësh uniformën më simbolike si maskat e grabitqarëve të bankave dhe të nxjerrësh para me ilaçin e të sëmurëve, është krim kundër njerëzimit.
Edi Rama: Duke u përgatitur për këtë adresim që është dhe publik se nuk ka si të jetë ndryshe në një moment shumë të errët që krijoi për të gjithë komunitetin e bluzave të bardha dalja në dritë e veprimtarisë të disa individëve mes jush në spitalin Onkologjik mu kujtuan fjalët e një prej heronjëve të mjekësisë shqitpare, profesor Besim Elezi ditën kur ishin bashkë në hapjen e spitalit ultra modern të sëmundjeve të brendshme.
As në ëndërr nuk e kishim parë dot një spital me këto kushte dhe ky spital nuk ka asgjë më pak se sa spitalet më të mirë të Evropës. Besim Elezi me kolegë i dha dritë këtij spitali, në kushtet më mizerabël, me mjete si në spitalet e mesjetës në Francë. Në këtë territor ku jemi sot, mungonte thuajse gjithçka, por nuk mungonte figura dhe përkushtimi i mjekut. Sot nuk mungon thuajse asgjë, por fatkeqësisht, jo gjithnjë, figura dhe përkushtimi i mjekut janë në lartësinë e misionit që nis me Betimin e Hipokratit. Të mos jesh në lartësinë e detyrës është përgjegjësi, por në punën tuaj, është një hall shumë i madh për njeriun, kur me njeriun lidhet fati i shëndetit të tij. Por të marrësh licensën dhe të përdorësh uniformën më simbolike si maskat e grabitqarëve të bankave dhe të nxjerrësh para me ilaçin e të sëmurëve, është krim kundër njerëzimit. Koha e Besim Elezit ka ikur, kjo kohë, sikurse jep mundësi të reja, e bën njeriun të pandjeshëm.
Fatkeqësisht, nuk mund të thuhet se radhët e shëndetësisë jan pastruar nga zullumqarët e shëndetit. Rrjetat e merimangave të Onkologjikut ishte më zi se korrupsioni i marrjes së parave për shërbimin, ishte krim kundër njerëzores. Tani të rikërkosh sot heronj si Elezi, kur mjekët shkonin në luftë me shpata, kur bota kishte shpikur raketat, nuk është mision i pamundur. Se po të mos ishin sot heronjtë kur Shqipëria u përball me Covid, numri i shqiptarëve që ndërruan jetë nën kthetrat e atij armiku të padukshëm do të kishte ku e ku më i madh.
Skandali te Onkologjiku, Koçiu: Drejtuesit në spitale publike, s’do të mund të kenë klinika private
Ministrja e Shëndetësisë, Albana Koçiu ka marrë pjesë në takimin që kryeministri Edi Rama thirri sot me shefat e shërbimit në QSUT pas skandalit të zbuluar në spitalin Onkologjik.
Gjatë fjalës së saj, ajo tha se do të bëhen ndryshime në Ligjin për Urdhrin e Mjekut, që detyrimi i deklarimit për punësimin në klinika private të mjekëve të punësuar edhe në sektorin publik, gjë për të cilën duhet të marrin autorizim nga ministria.
“Ata individë të gjykohen me zero tolerancë dhe të marrin ndëshkimin e merituar. Kam folur me shumë nga ju këtu dhe e kam ndjerë deri në palcë plagosjen e rëndë morale për atë neveri. Shumica juaj nuk janë si ata. Në vetë spitalin Onkologjik ka mjekë të përkushtuar që punojnë çdo ditë dhe nuk e meritojnë njollën e zezë që ua vunë kolegët e tyre të paskrupujt. Ne duhet të marrim masa konkrete dhe të reagojmë menjëherë për të mos patur më vend për praktika të tilla abuzive. Kemi punuar për disa ndryshime të shpejta në ligjin për Urdhrin e Mjekut. Mjekët e punësuar në sektorin public që kanë hapur apo punojnë në klinika private, duhet të marrim autorizim apo leje nga drejtuesi i spitalit, gjë që do i njoftohet edhe ministrisë”- u shpreh Koçiu.
Ndër të tjera, ajo tha se nuk do të lejohet më që mjekë të cilët kanë pozicione drejtuese në spitalin publik, të kenë apo të jenë të punësuar në klinika private. Ministrja nënvizoi se pas kalimit të ndryshimeve në ligjin për Urdhrin e Mjekut, të gjithë ata mjekë të cilët shkelnin betimin e Hipokratit duke shkaktuar pasoja të rënda tek pacientët, do të ndëshkoheshin me heqje të licensës për një periudhë afatgjatë deri në heqjen e të drejtës së ushtrimit të profesionit për gjithë jetën.
Mjekët që kanë hapur ose punojnë në klinika private, nuk do mund të mbajnë asnjë post drejtues në spitalet publike apo në universitetet e mjekësisë. Historia e transferimit të pacientëve në klinikat private, do të përfundojë sapo të kalojë ky ligj.
“Shkelja e rregullit që drejtuesit publikë nuk mund të kenë klnika private dhe nuk mund të punojnë në to, do mund të çojë deri në përfundimin e aktivitetit për të dyja palët. Mos deklarimi i lejes për punësim në privat do çojë deri në heqjen e licensës. Shkelja e premtimit të “Hipokratit” do të çojë gjithashtu deri në heqje të licensës për afate domethënëse. Individët që njollosin institucionit duke shkelur çdo normë, do u ndalohet ta veshin bluzën e bardhë gjatë gjithë jetës ”- shtoi ministrja. Versus.al
Skandali i mjekëve te Onkologjiku, Rama mbledh sot shefat e shërbimeve në QSUT
Paraditen e sotme kryeministri Edi Rama ka thirrur një mbledhje me të gjithë shefat e shërbimeve në Qendrën Spitalore Universitare Nënë Tereza” që ditë më parë u përfshi në një skandal, ku u zbulua se mjekë në pavionin e Onkologjisë zhvasnin pacientët me kancer duke mos i trajtuar ata siç e kishin për detyrë por duke i orientuar drejt spitaleve private.
Mbledhja do të mbahet në ambientet e QSUT, në një kohë kur janë cënuar më shumë se kurrë raportet e besimit mes mjekëve dhe pacientëve.
Për rastin e rëndë pati edhe protesta nga qytetarët para ministrisë së Shëndetësisë, të cilët u shprehën se ndihen totalisht të pasigurt kur shkojnë në spitalet publike. Ndërsa opozita në interpelancën urgjente që pati me ministren e Shëndetësisë, Albana Koçiun, kërkoi dorëheqjen e kësaj të fundit.
Në dosjen e zbardhur nga prokuroria e Tiranës, u zbulua sesi mjekët e Onkologjikut Edmond Gashi dhe Alketa Ymeri (Pere) bashkëpunonin edhe me kordinatorin e spitalit, Emiljano Lelën për të zhvatur pacientët me kancer duke mos i trajtuar këta të fundit ashtu siç e kishin për detyrim, por duke i dërguar në klinikën private të Edmond Gashit, “Megis” ku u merreshin shuma të mëdha parash duke ua paraqitur gjendjen më të rëndë nga sa ishte. Mjeku Edmond Gashi u la në arrest shtëpie, ndërsa menjëherë pasi doli nga gjykata shkoi në lokal duke e thyer masën e sigurisë. Për këtë shkelje nisi edhe një tjetër procedim ndaj tij. Ndërsa Halil Gashi dhe farmacisti Florian Marku, po ashtu u lanë në “Arrest shtëpie”. Mjekja Alketa Pere, zv.drejtoresha e QSUT Brikena Qirjazi dhe koordinatori Emiljano Lela, u lanë në masën e sigurisë “Detyrim paraqitje”.
Versus.al publikoi më herët një artikull ekskluziv ku mjeku Ardian Hoti i cili ishte dorëhequr nga spitali Onkologjik, tregon sesi e kishte denoncuar skandalin me pajisjen e kobaltit për trajtimin e kancerit, pajisje që nuk ishte vënë në punë. Ai tregon se pavarësisht denoncimeve të tij, për rrezikun që i kanosej edhe punonjësve nga rrezatimi i kësaj pajisje, ankesat e tij nuk morën asnjë përgjigjie dhe u detyrua të dorëhiqej nga spitali të cilit i kishte kushtuar shumë vite punë në shërbim të qytetarëve. Versus.al
