Pas Bashkimit Europian, edhe ambasada e SHBA ka reaguar lidhur me përplasjet e djeshme në Kuvendin e Shqipërisë ku deputetët e partisë demokratike hodhën sende të forta ndaj ministrave e deputetëve dhe më pas dogjën karriget e tyre.

Në reagimin e shpërndarë në rrjetet sociale thuhet se SHBA-të e shohin me shqetësim kaosin e krijuar në skenën politike dhe bëjnë thirrje që palët të tregojnë vetëpërmbajtje dhe të angazhohen në dialog konstruktiv mes tyre.

“Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën. Akte të tilla dëmtuese dhe potencialisht lënduese nuk kanë vend në procesin demokratik. Nxisim të gjitha palët e përfshira të ushtrojnë vetëpërmbajtje, të angazhohen në dialog konstruktiv si dhe të përqafojnë vlerat e respektit dhe qytetarisë. Mbështesim diskutimet paqësore dhe bashkëpunuese lidhur me negociatat për anëtarësimin e Shqipërisë në BE si dhe do të vazhdojmë të qëndrojmë krah institucioneve shqiptare teksa punojnë për ta sjellë Shqipërinë më pranë bashkësisë euro-atlantike”- thuhet në reagim.

Për trazirat e djeshme në Kuvend, policia ka dorëzuar në SPAK provat në bazë të të cilave akuzon 23 deputetë demokratë për veprat penale të shkatërrimit të pronës me zjarr dhe të goditjes për shkak të detyrës. Versus.al

Policia e Tiranës ka mbledhur provat dhe ka referuar në SPAK materialet ku kallëzon 23 deputetë të Partisë Demokratik për 2 vepra penale, shkatërrim të pronës me zjarr dhe goditje për shkak të detyrës.

Në njoftim bëhet me dije se kreu i grupit parlamentar, Gazment Bardhi si dhe deputetët Flamur Noka e Bledion Nallbati akuzohen për shkatërrim të pronës me zjarr dhe për goditjen e deputetëve e ministrave të PS për shkak të detyrës.

Dje Bardhi hodhi këmbë karrigesh drejt kryeparlamentares Elisa Spiropali ndërsa Nallbati e Noka u përplasën me Petro Koçin dhe ministra të tjerë të cilëve u hodhën sende të forta. Për padinë në SPAK, lajmëroi pak më herët edhe ministri i Brendshëm Ervin Hoxha i cili e cilësoi sjelljen e opozitës si “të papranueshme”.

Ndërkohë në njoftimin zyrtar të policisë, 20 deputetë të tjerë demokratë akuzohen për shkatërrim të pronës me zjarr.

Njoftimi i policisë:

Specialistët e Sektorit për Hetimin e Krimeve të Rënda në bashkëpunim me Komisariatin e Policisë Nr. 1 kanë referuar materialet në Prokurorinë e Posaçme kundër Korrupsionit dhe Krimit të Organizuar në ngarkim të shtetasve:

– F. N., 53 vjeç, banues në Tiranë, për veprat penale “Shkatërrimi i pronës me zjarr” dhe “Goditjet për shkak të detyrës”, parashikuar nga nenet 151 dhe 237 të Kodit Penal;

– G. B., 38 vjeç, banues në Tiranë, për veprën penale “Goditjet për shkak të detyrës”, parashikuar nga neni 237 të Kodit Penal;

– B. N., 39 vjeç, banues në Tiranë, për veprën penale “Shkatërrimi i pronës me zjarr” parashikuar nga nenet 151 i Kodit Penal;

– Dh.Ç.(T)., 51 vjeçe,

– F. H., 56 vjeç,

– Xh.M., 57 vjeç,

– L.G., 52 vjeç,

– A.Gj., 50 vje

– I.Zh., 37 vjeçe,

– L.M., 47 vjeçe,

– D.S., 59 vjeç,

– L.B., 61 vjeç,

– L.H., 57 vjeç,

– A.D., 57 vjeç,

– E.B., 51 vjeç,

– E.Xh., 39 vjeçe,

– S.K., 40 vjeçe,

– S.K., 43 vjeç,

– E.S., 66 vjeç,

– K.M., 62 vjeç,

– V.D., 56 vjeç,

– M.K., 50 vjeçe;

– I.Ç., 60 vjeç, të gjithë banues në Tiranë, për veprën penale “Shkatërrimi i pronës”, parashikuar nga neni 150 i Kodit Penal.

Ditën e djeshme, gjatë zhvillimit së seancës plenare, në Kuvendin e Republikës së Shqipërisë, këta shtetas (deputetë në Kuvendin e Republikës së Shqipërisë) kanë kryer veprime të dhunshme duke dëmtuar foltoren e Kuvendit, kanë thyer një karrike dhe kanë hedhur në drejtim të Kryetares së Kuvendit dhe anëtarëve të kabinetit qeveritar, sende të forta (pjesë të karriges së thyer). Gjithashtu kanë djegur disa karrige, në ambientet e jashtme të Kuvendit të Republikës së Shqipërisë. Versus.al

Ambasadori i Bashkimit Europian në vendin tonë, Silvio Gonzato ka reaguar për dhunën dhe kaosin e shkaktuar nga Partia Demokratike në seancën plenare të ditës së djeshme. Ai shprehet i keqardhur dhe bëri thirrje që të mos përdoret dhunë në shprehjen e mendimit.

“Është për të ardhur keq që për një çështje tjetër disa përfaqësues të opozitës përdorën mënyra që ndërpresin mbarëvajtjen e jetës parlamentare në kuvend. Është për të ardhur keq. Për çfarëdo ideje që kemi nuk është kjo mënyra për ta shprehur mendimin.

Në një demokraci funksionale si Shqipëria pakënaqësitë duhet të shprehen në mënyrën e duhur e nuk duhet të përdoren dhunë apo dëmtime ndaj pronës për të shprehur mendimin, deputetët e kuvendit duhet të kenë mundësinë të përmbushin rolin e tyre në siguri të plotë”- shkruan Gonzato në reagimin e tij.

Më herët, ministri i Brendshëm Ervin Hoxha njoftoi se punonjësit e Gardës po merreshin me mbledhjen e provave të cilat do të dorëzohen si fakte në SPAK kundër deputetëve demokratë, duke i akuzuar këta të fundit se kanë kryer 5 vepra penale me dhunën dhe kaosin e djeshëm në Kuvend. Versus.al

Nga aksioni i djeshëm i opozitës në Kuvend ka mbetur i plagosur dhe nënkryetari i Partisë Demokratike, Gaz Bardhi.

Lajmi është bërë i ditur nga drejtori i komunikimit në Partinë Demokratike, Alfred Lela që tregoi se Bardhi është lënduar gjatë protestës dhe tensioneve të djeshme në Parlament.

I ftuar në emisionin “Open” në News24, Lela sqaron se Bardhi ka marrë plagë në këmbë, pasi i ka rënë foltorja dhe shkoi në spital për të marrë ndihmën mjekësore.

“Është lënduar në këmbë, i ka rënë foltorja kur e kanë tërhequr për ta rrëzuar. I ka dëmtuar këmbën dhe po merr ndihmën dhe nuk ishte në gjendje të mundshme. I urojmë shërim të shpejtë”, tha Lela.

Ditën e djeshme seanca parlamentare zgjati pak minuta pas përplasjes verbale dhe fizike mes maxhorancës dhe deputetëve të opozitës.

Këta të fundit në shenjë proteste ndaj arrestimit të kolegut të tyre, Ervin Salinaji, shkulën Foltoren , qëlluan me karrige drejt kryeparlamentares, Elisa Spiropali dhe dogjën karriget në oborrin e Parlamentit./Versus.al

Video nga momenti kur Bardhi qëllon me karrige Spiropalin:

Ministri i Brendshëm Ervin Hoxha dhe foto nga djegia e karrigeve jashtë Kuvendit

Ministri i ri i Brendshëm, Ervin Hoxha duket se do të ketë një qasje ndryshe nga paraardhësit e tij, duke e marrë më me seriozitet kaosin dhe dhunën e ushtruar nga opozita në seancën plenare të Kuvendit.

Nëpërmjet një deklarate të publikuar në rrjetin social, facebook, Hoxha i cilëson si “të papranueshme” veprimet e opozitës në seancën plenare të ditës së djeshme ku kryeparlamentarja Elisa Spiropali lexoi shkresën e prokurorisë së Tiranës për arrestimin e Salianjit, duke i hequr këtij të fundit mandatin e deputetit.

Në reagimin e bërë, ministri liston disa akte të cilat sipas tij përbëjnë vepra penale, ndërsa njofton se do pjesëtarët e Gardës po grumbullojnë provat të cilat më pas do të dorëzohen në Prokurorinë e Posaçme (SPAK).

Reagimi i plotë:

Flakët e zjarrit, pasditen e djeshme, në dyert e Kuvendit të Shqipërisë, që është tempulli më i lartë i një sistemi demokratik, janë akt që përdhos ndjenjat e qytetarëve të këtij vendi. Kuvendi mbetet thelbi i shprehjes së vullnetit dhe besimit të votuesve, ndaj çdo akt vandalizmi brenda apo në dyert e tij, është absolutisht i papranueshëm dhe i ndëshkueshëm ligjërisht.

Pengimi i ushtrimit të funksioneve kushtetuese

Heqja me dhunë e të drejtës së fjalës

Goditja për shkak të detyrës

Rrezikimi i jetës së deputetëve duke i goditur me mjete të forta

Shkatërrimi me zjarr i pronës publike ishin akte të rënda dhune dhe vandalizmi, ishin akte të rënda dhune dhe vandalizmi.

Në Parlament nuk vihet me shishe benzine, por për të ushtruar lirinë e të drejtës së fjalës mbi bazën e mandatit që merr nga zgjedhësit.

Zjarrvënia, por dhe aktet e tjera të dhunës gjatë seancës parlamentare, ishin vendngjarje për organet ligjzbatuese.

Policia e Shtetit dhe Garda e Republikës kanë kryer menjëherë të gjitha veprimet procedurale, duke administruar pamjet filmike dhe çdo element tjetër me interes për hetimin. Ngjarja do të referohet në përfundim të këtyre veprimeve, në Prokurorinë e Posaçme (SPAK), për shkak të cilësive të veçanta, që kanë deputetët.

Për ngjarjen e paprecedentë reagoi dhe edhe kryeministri Edi Rama i cili tha se e gjitha kjo po ëhej pas një vendimi të dhënë nga gjykata, ndërsa u përpoq të bënte krahasim mes dhunës së opozitës dhe qeverisjes së tij. Versus.al

Partia Demokratike do të zhvillojë sot një mbledhje me aleatët opozitarë për të përcaktuar vijimin e aksionit të tyre në kushtet ku ndodhet aktualisht politika shqiptare. Mbledhja do të mbahet sot në orën 12:00 në selinë e PD-së ku pritet të jenë të pranishëm aleatët e partive të tjera opozitare të cilët janë pjesë e të ashtuquajturës “Federata opozitare”.

Më herët deputetët demokratë kanë deklaruar ndërprerjen e marrëdhënieve institucionale me mazhorancën e kryeministrit Edi Rama ndërsa ditën e djeshme në shenjë revolte, deputetët shkaktuan kaos në seancë plenare dhe më pas dogjën edhe karriget e deputetëve.

Më 7 tetor, në orën 18:00 PD ka thirrur protestë në Tiranë e cila pritet të nisë para godinës së kryeministrisë dhe do të vijojë me bllokime aksesh rrugore në formën e mosbindjes civile.

Situata u përshkallëzua pas dënimit me 1 vit burg dhe arrestimin e deputetit Ervin Salianji pasi u shpall fajtor nën akuzën e kallëzimit të rremë. Ky dënim u cilësua si politik nga ana e deputetëve të PD-së. Versus.al