Ambasadori i Bashkimit Europian, Silvio Gonzato nënkuptoi se nuk është i gatshëm të ndërmjetësojë një dialog mes opozitës dhe qeverisë për zgjidhjen e krizës parlamentare aktuale e cila ka sjellë një anomali në Kuvend.

Ai tha se ka mënyra të tjera me anë të të cilave opozita duhet të tentojë të shprehë mendimin ndryshe.

“E dua muzikën por nuk mendoj se jam dirigjent i mirë. Më mirë rri në auditor. Do të keni dëgjuar që kam theksuar se duke pasur parasysh reformat që duhen ndërmarrë nga Shqipëria janë ndërmarrje shoqërore për të ndryshuar mënyrën si funksionon shoqëria duhet edhe pjesëmarrja e opozitës. Jam përpjekur të mbaj të përfshirë opozitën.

Ka mënyra për të shprehur mospajtimin, ndryshimin e mendimit. Shpresoj që do të gjendet një rrugë për të riangazhuar opozitën. I gatshëm të ndaj çdo informacion që më kërkohet por kërkon angazhim nga të dy palët jo vetëm nga qeveria”- u shpreh Gonzato.

Në progress-raportin të cilin ia dorëzoi presidentit Begaj dhe kryeministrit Rama, ambasadori i Bashkimit Europian tha se ka arritje të Reformës në Drejtësi, konkretisht SPAK-ut që ka bërë të mundur ndëshkimin e zyrtarëve të lartë. Versus.al

Kreu i ekzekutivit, Edi Rama gjatë konferencës së përbashkët që pati me ambasadorin e BE, Silvio Gonzaton me të cilin diskutoi lidhur me progress-raportin e KE foli edhe mbi kaosin e krijuar së fundmi nga opozita në Kuvend.

Rama tha se opozita është vetëpërjashtuar nga procesi i integrimit drejt BE-së, ndërsa tha se sjellja e demokratëve në Kuvend është zgjedhje e tyre.

“Më vjen keq që ndihen të përjashtuar. Ështëvetëpërjashtim absolut pa asnjë bazë. Është zgjedhja e tyre legjitime, jemi vend i lirë demokratik dhe edhe zgjedhja për të vrarë veten politikisht, është legjitime, nuk ndalohet”- tha Rama.

Ai foli edhe për kohën kur PS ka qenë në opozitë duke argumentuar se qeveria e Berishës nuk pranonte të dialogonte ndërsa tha se qeveria e tij është e gatshme të bisedojë me opozitë, por theksoi se kjo nuk është mënyra e duhur.

“Kur ne kemi qenë në opozitë problem ka qenë që nuk pranonin të uleshim të flisnim dhe nuk kemi marrë përgjigjie. Diskutimet bëhen përmes gjuhës jo përmes këmbëve dhe shkelmave”- shtoi kryeministri.

Më herët, gjatë seancës së mbajtur në Kuvend ftesën ndaj opozitës për të zgjidhur kaosin duke u ulur në bisedime, e bëri edhe kryeparlamentarja Elisa Spiropali. Versus.al

Kryeministri Edi Rama ka mbajtur ditën e sotme një konferencë të përbashkët për shtyp me ambasadorin e BE, Silvio Gonzaton lidhur me progress-raportin e Komisionit Europian për Shqipërinë.

Rama e cilësoi raportin si më të mirin ndër vite duke theksuar vlerësimin e bërë për SPAK-un dhe rritjen ekonomike. Sipas tij, kushdo që do të dijë gjendjen aktuale të vendit, duhet të lexojë raportin e publikuar.

“Është i vetmi raport ndërkombëtar që bazohet në fakte dhe jo në perceptime apo sondazhe. U referohet fakteve në kuadër të funksionimit të institucioneve. Ne sot marrim raportin më pozitiv të të gjithë këtyre viteve sepse e tillë është edhe ecuria e vendit. Konferenca e dytë ndërqeveritare afirmoi njohjen e përparimit të bërë nga Shqipëria në përmbushjen e kushteve për këtë fazë. Raporti është real dhe i balancuar dhe përcakton hapat që duhen bërë më tej dhe kushtet që duhet të përmbushim për anëtarësim.

Në përmbledhjen e bërë nga ambasadori ishte shumë e qartë se cilat janë adresimet që duhen bërë në këtë fazë të re të procesit. Kushdo që dëshiron të kuptojë dhe mësojë ku ndodhet sot Shqipëria në të gjitha fushat, bën mirë ta lexojë këtë raport sepse askund tjetër nuk do gjejë një analizë më të përpiktë të situatës aktuale të vendit.

Disa nga momentet më kryesore të raportit, së pari drejtësia. Përtej të gjitha polemikave raporti bën një vlerësim të lartë mbi zbatimin e Reformës në Drejtësi. Ka pika që duhen adresuar dhe boshllëqe që duhen mbushur. KE vlerëson punën e SPAK-ut me shumë të drejtë, me avancimin e hetimeve dhe rezultateve përfshirë edhe ndaj atyre me profile të larta politike.  Ekonomia dhe rritja e mirëqenies. Kjo konfirmohet nga raporti i KE  që vlerëson edhe rënien e defiçitit dhe uljen e borxhit publik duke nënvizuar se sektori financiar është i qëndrueshëm”- u shpreh Rama ndër të tjera.

Ai shkoi më tej duke thënë se përkundër artikujve të mediave, Shqipëria është vendi më i përparuar në rajon sa i takon prokurimeve publike. Sipas tij, pavarësisht problemeve politike qeveria ka ecur përpara në këtë sektor.

“Ju e dini shumë mirë që konferenca e dytë ndërqeveritare u shty në kohë për shkak të një ngërçi politik me vëllezërit tanë në Greqi. E keni dëgjuar që kam thënë se kjo nuk ka pikë rëndësie për ne. Ne kemi hapur grupkapitullin e parë dhe të tjerë në rajon janë në negociata prej disa vitesh, por Shqipëria është i vetmi vend i rajonit që në fushën e prokurimeve publike nuk ka piketa të ndërmjetme deri në anëtarësim. Kjo do të thotë se Shqipëria konsiderohet vendi më i avancuar në prokurimet publike që është një fakt që shqiptarët nuk e mësojnë dot nga mediat.

Shqipëria renditet e para në rajon për prokurimet publike. Nuk kemi humbur asnjë minutë pavarësisht problemeve politike. KE ka rekomanduar 3 herë rresht hapjen e negociatave. Ne do jemi gati ta ngremë flamurin tonë në BE brenda kësaj dekade. A do e bëjmë ne këtë punë që nuk e ka bërë asnjë vend tjetër më përpara? Ne do e bëjmë punën që kjo të ndodhë” tha kreu i ekzekutivit.

Në përfundim të deklaratës së tij mbi këtë çështje, Rama tha se ka shumë punë për t’u bërë për anëtarësim në BE, proces që sipas tij do të përmbyllet deri në 2030-ën. Versus.al