Çfarë do të gjeni në brendësi
*Reperi Rigel Rajku i njohur me emrin e artit “Noizy” u arrestua mesnatën e mbrëmshme në Shëngjin pasi ishte shpallur në kërkim nga policia e Kosovës për rrahjen e personazhit të TikTok-ut Medi Iseni më 2 gusht në Pejë. Në pranga me të ra edhe Bahtjar Bajraktari (DJ Crax). *Arrestimi u krye nga “Fast Albania” para se Noizy të mbante koncertin e tij, ndërsa menjëherë nisën procedurat për ta ekstraduar në Kosovë ku është shpallur në kërkim. *Ndaj Noizyt dhe DJ të tij rëndon akuza për lëndim të rëndë trupor. Në kërkim është shpallur edhe reperi Arkimed Lushaj i njohur si “Stresi” pasi dyshohet se planifikoi ngjarjen për ta zënë në pritë Isenin.
U arrestuan në Shëngjin, akuza që rëndon ndaj Noizyt dhe DJ të tij për rrahjen e Medi Isenit
Rigels Rajku, reperi i njohur si Noizy dhe DJ i tij Bahtjar Bajraktari (Dj Crax) të dyshuar si të përfshirë në rrahjen brutale të personazhit të TikTok-ut, Medi Iseni akuzohen nga policia e Kosovës për plagosje të rëndë.
Pas arrestimit të tyre në Shëngjin, të dy do të ekstradohen drejt Kosovës ku më pas do të dalin para organit të akuzës dhe do të përballen me veprat që rëndojnë ndaj tyre.
“Në vijim të operacioneve të njëpasnjëshme për kapjen e shtetasve të shpallur në kërkim, nga Drejtoria e Forcës së Posaçame Operacionale, Sektori për Kërkimin, Njësia "FAST Albania" në Departamentin e Policisë Kriminale në PSH, është marrë informacion nga FAST Kosova, për 2 shtetas të kërkuar për llogari të Kosovës, që mund të fshiheshin në Shqipëri.
Menjëherë, FAST Albania, bazuar në inteligjencën policore, bëri të mundur lokalizimin e 2 të kërkuarve, dhe në kuadër të operacionit policor "Fast", kapi në Lezhë dhe arrestoi 2 shtetasit e shpallur në kërkim nga Policia e Kosovës, konkretisht shtetasin R. R., nga Durrësi, dhe shtetasin B. B., nga Prishtina. Kapja dhe arrestimi i tyre u bënë me qëllim ekstradimin në Kosovë.”- thuhet në njoftimin e policisë.
Për ngjarjen u shpall mbrëmë në kërkim edhe reperi Arkimed Lushaj “Stresi” i cili u akuzua nga i dhunuari se e kishte “nxjerrë në pritë” për t’u rrahur më pas nga Noizy dhe anëtarët e grupit të tij për sharje dhe ofendime që personazhi i TikTok-ut i kishte bërë në rrjetet sociale. Versus.al
‘Fast Albania’ e arrestoi para koncertit në Shëngjin, si u përfshi Noizy në rrahjen e TikTok-erit në Kosovë
Reperi i njohur Noizy, u arrestua pak pas mesnatës së djeshme në Kune të Shëngjinit ku po përgatitej të mbante një koncert. Arrestimi i tij dhe i DJ Crax u bë nga Fast Albania me urdhër të policisë së Kosovës që i kishte shpallur në kërkim për rrahjen brutale të personazhit të Tik-Tok-ut Medi Isenit më 2 gusht në një lokal nate në Pejë.
Pas ngjarjes, prokuroria e Pejës i dërgoi Noizyt kërkesë për paraqitje në komisariat për të dhënë detajet rreth ngjarjes, por ky i fundit nuk u paraqit duke bërë që ndaj tij të lëshohej një urdhër-arresti.
Pavarësisht akuzave të bëra nga i dhunuar, Medi Iseni Noizy ka mohuar përfshirjen e tij në ngjarje. Ndërsa reperi tjetër Stresi i cili është shpallur në kërkim, në deklaratat e dhëna në media ka thënë se rrahja e Medi Isenit u bë nga persona të tjerë të cilët ky i fundit i kishte sharë në rrjetet sociale.
Pas kërkesës së policisë së Kosovës për t’u paraqitur në komisariat dhe pas lakimit të emrit të tij si një prej personave të shumtë që kishin dhunuar Medi Isenin, Noizy zgjodhi të reagonte nëpërmjet një videoje të publikuar në rrjetin e tij social ku tregohej se një natë para ngjarjes, personazhi i TikTok-ut planifikonte me persona të tjerë sesi do të shkonte në koncertin e Noizyt dhe të bënte “pompa” në prapaskenë.
Megjithatë, në versionin e dhënë nga ai, Noizy thotë se në momentin kur ka qenë duke hyrë në prapaskenë, ka parë që kishte shpërthyer një sherr i madh mes Medi Isenit dhe shumë personave të tjerë, gjysmën prej të cilëve reperi u shpreh se nuk i njihte. Ai pretendon se emri i tij po dëmtohet qëllimisht dhe se nuk ka pasur asnjë lidhje me këtë ngjarje duke e lënë në dorë të avokatëve të tij që të merreshin me këtë çështje. Por mesa duket, strategjia e ndjekur nga Noizy nuk funksionoi dhe u arrestua në orët e mesnatës së djeshme në Shëngjin. Versus.al
Rrahja e personazhit të TikTok-ut, Noizy dhe DJ i tij arrestohen në Shëngjin! Në kërkim edhe Stresi
Reperi Rigels Rajku i njohur me emrin e artit “Noizy” është arrestuar në Shëngjin gjatë orëve të vona të mbrëmjes së djeshme pasi ishte shpallur në kërkim nga policia e Kosovës për rrahjen e personazhit të tiktok-ut, Medi Iseni më 2 gusht brenda një lokali në Pejë.
Arrestimi i Noizyt u bë nga Eurojust në momentin kur ai po shkonte për të mbajtur një koncert. Së bashku me të u arrestua edhe DJ i tij Bahtjar Bajraktari i njohur me emrin e artit “Dj Crax” i cili po ashtu dyshohet të jetë përfshirë në rrahjen e Medi Iseni. Ndërsa në kërkim për ngjarjen është shpallur edhe reperi Arkimed Lushaj i njohur me emrin e artit “Stresi”.
Medi Iseni u paraqit në urgjencën e spitalit të Pejës i dhunuar rëndë në orët e para të mëngjesit të 2 gushtit, ndërsa para policëve pretendoi se ishte dhunuar nga reperi Noizy dhe anëtarë të grupit të tij me doreza hekuri.
Reperi në një reagim të bërë dy ditë më parë dhe sërish ditën e djeshme, mohoi që të ishte përfshirë në rrahjen e Medi Isenit duke shkruar në rrjetet sociale se nuk e dinte sesi situata kishte shkuar deri në konfrontim fizik mes tij dhe disa personave që nuk i njihte. Noizy pretendoi se pasi kishte shpërthyer sherri, ishte larguar nga ana e sigurimit të klubit dhe për pasojë nuk ishte përfshirë në rrahje. Ndërsa dje theksoi se e gjitha kjo po bëhej për të njollosur emrin e tij.
Nga ana tjetër, reperi Arkimed Lushaj u akuzua nga Medi Iseni se e nxorri në pritë në rrahjen që pretendon se i bëri Noizy dhe grupi i tij. Versus.al
