Nga: Boris Johnson, Daily Mail

Kjo ishte, ndoshta, skena më neveritëse në gjithë historinë e shëmtuar të diplomacisë ndërkombëtare. Të shihje Putinin të mirëpritur në tokën amerikane, të bënte të ngritej vreri.
Ishte për të vjellë kur e duartrokitën mbi tapetin e kuq.

Ishte përzierje e vërtetë të shihje buzëqeshjen e tij si e Gollumit, teksa bëhej një nga të paktët liderë botërorë që kanë hipur ndonjëherë në limuzinën presidenciale amerikane.

Ishte edhe më e padurueshme ta dëgjoje tek merrte një platformë amerikane për të shpërndarë gënjeshtrat e tij mbi shkaqet e luftës në Ukrainë – një vend që në vitin 2014, kur ai e sulmoi për herë të parë, nuk përbënte absolutisht asnjë kërcënim për Rusinë.

Ndërsa e dëgjoja tek përpiqej, me atë servilizmin e lodhshëm e të parashikueshëm, të lëpinte e njëkohësisht të poshtëronte në mënyrë të fshehtë Donald Trump-in, m’u ngrit stomaku. Jam i bindur se edhe ju ndjetë po njësoj – dhe shumica prej nesh nuk jemi as ukrainas.

Imagjinoni çfarë ndjenje duhet të kishin ushtarët ukrainas nëpër llogore pranë Pokrovskut, duke luftuar për lirinë e vendit të tyre, kur dëgjuan presidentin e Shteteve të Bashkuara – kapitenin de facto të ekipit të “Botës së Lirë” – ta quante Vladimir Putinin “shefi”.
Për të vjellë.

Mendoni për dhjetëra mijëra vejushat dhe jetimët ukrainas. Mendoni për të gjymtuarit, për të plagosurit; mendoni për civilët që jetojnë çdo ditë e natë nën tmerrin e bombave dhe raketave të Putinit – që vazhdojnë të bien, edhe pse të ashtuquajturat negociata po zhvilloheshin në Alaska.
Pyeteni veten si ndihen ata njerëz kur dëgjojnë presidentin amerikan – njeriun që, në njëfarë mënyre, është garantuesi suprem i lirisë dhe demokracisë në botë – të flasë për “marrëdhënien fantastike” që ka me Putinin, një diktator që po torturon vendin e tyre prej tre vitesh e gjysmë.

Ishte një moment i ndyrë, sepse Putini është një kriminel lufte, gënjeshtrat dhe agresioni i të cilit janë plotësisht të ngjashme me ato të Hitlerit.

Dëgjon shpesh qëllimin e Shtëpisë së Bardhë: “të ndalim vdekjet”, ose “të ndalim vrasjet” në Ukrainë, sikur të kishte faj nga të dyja palët. Çfarë marrëzie.
Gjaku i çdo rusi të vrarë në këtë luftë është mbi duart e Putinit. Gjaku i çdo ukrainasi të vrarë është mbi duart e Putinit.

E gjithë masakra dhe tragjedia në Ukrainë është faji i një njeriu të vetëm – sepse sot nuk do të kishte luftë, nuk do të kishte gjakderdhje, nuk do të kishte katastrofë, po të mos ishte për arrogancën e pandalshme, marrëzinë dhe llogaritjet e gabuara të Vladimir Vladimiroviç Putinit.

Prandaj ishte aq e vështirë të duroje pamjen e Putinit që shfaqej si gjel në samitin e Alaskës. Prandaj ngjarja ishte kaq e papranueshme.
Dhe megjithatë, si shumë nga pjesët më të neveritshme të diplomacisë historike, edhe kjo ishte, në njëfarë mënyre, e justifikueshme dhe madje e domosdoshme.

Sado për të vjellë që dukej, Trump kishte të drejtë të provonte. Kishte të drejtë të takohej me Putinin, sepse, nëse miliona ukrainas po e ndiqnin me tmerr reabilitimin me tapet të kuq të tiranit rus, ata po e ndiqnin gjithashtu edhe me shpresë.

Po shpresonin se, ndoshta, ndoshta, ky negociatori i famshëm nga Nju Jorku do të arrinte një zgjidhje që do ta ndalte luftën – por duke ruajtur atë që ata duan dhe kanë nevojë: lirinë, sovranitetin dhe pavarësinë e vendit të tyre.
Donald Trump kishte dhe ka të drejtë të marrë riskun, sepse ai e di se një ditë Putini do të detyrohet të bëjë një marrëveshje. Pozicioni i tij në Moskë është shumë më i dobët nga sa duket.

Ekonomia ruse po kërcet nën barrën e luftës. Papunësia po ngrihet, njësoj si inflacioni dhe normat e interesit.

Putini ka parë një nga klientët e tij më të mëdhenj të naftës – Indinë – të ndëshkuar papritur nga sanksionet sekondare të Trump-it, dhe tashmë raportet e Bloomberg tregojnë shenja se blerësit indianë po largohen nga hidrokarburet ruse.

Më e rëndësishmja: Putini ende nuk ka arritur dhe nuk do të arrijë kurrë ta shkelë shpirtin e rezistencës ukrainase. Po, situata është shumë e vështirë për luftëtarët ukrainas, dhe po, me përpjekje titanike dhe me kosto marramendëse, Putini ka arritur disa përfitime të vogla në lindje – të sajuara me kujdes për të përkuar me samitin e Alaskës.

Por këto fitore janë frenuar sërish nga ukrainasit dhe, deri më tani – në mesin e gushtit – ofensiva e shumëtrumbetuar ruse për verën e vitit 2025 ende nuk është materializuar, e aq më pak të ketë sukses.

Trump kishte 100% të drejtë të ndiente një shans për paqe, dhe të dëshironte ta arrinte. Ai mendon, ashtu si Benjamin Franklin, se “s’ka asnjë luftë të mirë, dhe asnjë paqe të keqe” – dhe ka të drejtë edhe këtu.

Por u bë e qartë për vëzhguesit e këtij samiti – dhe, besoj, edhe për negociatorët amerikanë në sallë – se Putini nuk dëshiron paqe, të paktën jo me kushte që SHBA apo Ukraina mund të pranojnë.

Kushdo që ka punuar me Trump-in dhe njeh humorin e tij, e kuptoi se ky takim nuk ishte i suksesshëm. Dreka e reklamuar nuk u mbajt.

Nuk pati asnjë diskutim për ndonjë partneritet të ri tërheqës tregtar SHBA-Rusi apo bashkëpunim arktik. Përkundrazi, samiti përfundoi papritur, disa orë më herët se parashikohej, me një konferencë shtypi krejtësisht bosh, ku Trump-i – në mënyrë të jashtëzakonshme – nuk mori asnjë pyetje nga gazetarët.

Takimi pati vetëm një vlerë: që në Alaska Trump u përball ballë për ballë me realitetin.
Putini në thelb kërkon të kontrollojë Ukrainën dhe ta kthejë atë sërish në një shtet vasal të Moskës.
Ukrainasit, në thelb, duan të jenë të lirë – dhe në këtë aspiratë ata kanë mbështetjen afatgjatë të demokracive perëndimore, dhe, thelbësisht, edhe të vetë Trump-it, dhe madje edhe të Melania Trump-it, Zonjës së Parë, e cila po luan një rol gjithnjë e më të madh në formësimin e mendimit të bashkëshortit të saj.

Trump ka kuptuar se kjo nuk ka të bëjë me pasuritë e paluajtshme. Nuk ka të bëjë me gjeografinë apo territorin. Kjo ka të bëjë me fatin.
Ka të bëjë me të drejtën e ukrainasve për të zgjedhur fatin e tyre si një komb i lirë dhe i pavarur evropian.

Dhe kjo luftë nuk do të marrë fund derisa Putini të pranojë të vërtetën: se e ka humbur betejën për fatin e Ukrainës.

Vetëm kur të ndodhë kjo – kur Putini të pranojë një të vërtetë shpirtërore që është e dukshme për këdo që viziton Ukrainën – atëherë do të kemi paqe.

Sinqerisht, dyshoj se Donald Trump do të shijojë titujt globalë të sotëm. Nuk besoj se do t’i pëlqejë ideja se Putini e ka mposhtur, se Trump i shtriu tapetin e kuq një të përbuzuri – dhe shpenzoi shumë kapital politik dhe nuk mori asgjë në këmbim.

Dështimi në Alaska do të forcojë bindjen e tij gjithnjë e më të fortë  se e vetmja mënyrë për ta zgjidhur këtë tani është duke shtuar presionin mbi Putinin.

Askush nuk priste vërtet që presidenti amerikan të vendoste sanksione sekondare mbi vendet që vazhdojnë të blejnë naftë e gaz rus – dhe megjithatë ai e bëri.

Po Britania? Po Evropa? Kur do ta kemi guximin të bëjmë të njëjtën gjë? Ky është kontinenti ynë. Ne vazhdimisht kërkojmë lidership nga Amerika – dhe megjithatë, kur ajo na e jep, ne nuk kemi as kurajën të ndjekim.

Një ditë kjo luftë do të mbyllet me një paqe që mbron lirinë e Ukrainës; por, siç tha Trump në Alaska, evropianët – të udhëhequr nga Britania – do të duhet të marrin më në fund përgjegjësinë./Përshtati në shqip Versus.al

Von der Leyen dhe Volodymyr Zelenskyy

Presidentja e Komisionit Evropian, Ursula von der Leyen, konfirmoi në një postim në Twitter se do të jetë nesër në Shtëpinë e Bardhë, ku është planifikuar një takim midis Presidentit të SHBA-së, Donald Trump, dhe homologut të tij ukrainas, Volodymyr Zelensky, në të cilin do të marrin pjesë edhe udhëheqës të tjerë evropianë.

Ajo sqaroi se pjesëmarrja e saj në takim ishte me ftesë të Zelensky-t, të cilin do ta mirëpresë sot në Bruksel.

“Këtë pasdite, do ta mirëpres Zelenskyn në Bruksel.Së bashku, do të marrim pjesë në Koalicionin e Vullnetit. Me kërkesë të Presidentit Zelensky, unë do t’i bashkohem takimit me Presidentin Trump dhe udhëheqës të tjerë evropianë në Shtëpinë e Bardhë nesër”, shkroi von der Lyen në një postim në “X”./Versus.al

Liderët europianë që bëjnë pjesë në të ashtuquajturën “koalicioni i vullnetit” pritet të zhvillojnë një konferencë virtuale të dielën, përpara bisedimeve të rëndësishme që presidenti amerikan Donald Trump do të ketë javën e ardhshme me presidentin e Ukrainës, Volodymyr Zelensky.

Koalicioni, i bashkëdrejtuar nga kryeministri britanik Sir Keir Starmer, presidenti francez Emmanuel Macron dhe kancelari gjerman Friedrich Merz, synon të bashkojë vendet për të mbrojtur një marrëveshje paqeje në Ukrainë.

Në krye të axhendës së takimit të së dielës është sigurimi i një zotimi konkret nga Trump për një garanci sigurie, e cila do të shërbente si garanci e fuqishme në çdo marrëveshje paqeruajtëse mes Rusisë dhe Ukrainës.

Liderët europianë janë treguar optimistë pas sinjaleve të fundit nga presidenti amerikan mbi këtë çështje, duke theksuar se fuqia ushtarake e SHBA-së do të ishte pengesë ndaj çdo avancimi të mëtejshëm nga Vladimir Putin.

Një tjetër pikë kyçe e diskutimit do të jetë përfshirja më e drejtpërdrejtë e Zelensky në bisedime, pasi takimi i fundit mes Trump dhe Putin në Alaskë e la atë jashtë procesit. Në deklarata të koordinuara, liderët europianë kanë theksuar se pa rolin e presidentit ukrainas nuk mund të ketë paqe të qëndrueshme.

Volodymyr Zelensky/Donald Trump

Të hënën, të gjithë sytë do të jenë nga Uashingtoni, ndërsa Volodymyr Zelenskyy kthehet në Shtëpinë e Bardhë për një takim me Donald Trump , bazuar në të dhënat e reja të gjeneruara nga takimi i presidentit amerikan me Vladimir Putin në Alaska dhe raportet për kërkesat e Rusisë për t'i thënë "po" paqes në Ukrainë.

Ndwrsa media britanike Sky News në analizën e saj të takimit të nesërm shkruan se "nuk do të ketë qilim të kuq, as paradë avionësh, as duartrokitje kur Zelensky të mbërrijë në Uashington. Megjithatë, kujtimi i hidhur i vizitës së tij të fundit në Shtëpinë e Bardhë   do të dominojë mendimet e presidentit ukrainas".

Duke kujtuar se shkurtin e kaluar, Trump "e tallte homologun e tij ukrainas për shkak se nuk kishte veshur kostum dhe i tha se "nuk kishte dokumente", përpara se të shoqërohej jashtë ndërtesës herët, si një klient i padisiplinuar ", gazeta britanike vëren se Zelensky "e di se rrezikon një tjetër pritë në Zyrën Ovale, por duhet ta paraqesë veten si një pjesëmarrës i gatshëm në bisedimet e paqes, nga frika se mos etiketohet si pengesë për arritjen e një zgjidhjeje".

Ajo që e shqetëson Kievin është se “Donald Trump duket se e ka braktisur pikën e vetme kyçe që udhëheqësit evropianë ia kishin bërë: se duhet të ketë një armëpushim pa kushte në Ukrainë si një kusht absolut për një zgjidhje të përhershme”.

“Trump me sa duket kishte arritur në përfundimin se një armëpushim nuk ishte i nevojshëm.

“Mënyra më e mirë për t’i dhënë fund luftës së tmerrshme midis Rusisë dhe Ukrainës... është të kalohet drejtpërdrejt në një marrëveshje paqeje”, shkroi ai në llogarinë e tij Truth Social”, vlerëson Sky News, duke folur për një “tronditje në Ukrainë” nga ky postim.

“Shumë në Ukrainë dhe gjetkë besojnë se Rusia nuk ka ndërmend ta ndalë luftën ende dhe do ta përdorë avantazhin e saj ushtarak në fushën e betejës për të ushtruar presion mbi Ukrainën në negociata të gjata për të lëshuar më shumë territor. Ndërkohë, masakra e ukrainasve do të vazhdojë”, vazhdon më tej medias britanike.

Siç vëren, "ky është ndryshimi më dramatik nga Trump, i cili para takimit dhe pas presionit nga udhëheqësit evropianë kishte deklaruar se nuk do të ishte i lumtur nëse Putini nuk do të binte dakord për një armëpushim, dhe madje kishte premtuar "pasoja serioze".

''Presidenti ukrainas me siguri do të jetë mërzitur kur të shohë imazhet e Putinit të pritur si një mbret në një bazë ushtarake amerikane në Alaska. Kjo është në kontrast të plotë me mënyrën se si u prit në tokën amerikane. Në botën e Trump, gjithçka është një garë personaliteti, dhe ndërsa ai tregon respekt të dukshëm për Putinin, ai e përçmon Zelenskyn. Kjo e bën pozicionin e ukrainasit shumë të vështirë", përfundon Sky News./Përshtati në shqip Versus.al

Dokumente qeveritare që detajonin samitin e ish-presidentit amerikan Donald Trump me presidentin rus Vladimir Putin u gjetën nga disa të ftuar në një hotel të Alaskës.

Tetë faqe të dokumenteve zyrtare u lanë pas në printerët e Hotel Captain Cook, një hotel me katër yje rreth 20 minuta larg bazës Joint Base Elmendorf-Richardson në Anchorage.

Përmbajtja e dokumenteve përfshinte itinerarin e samitit, numrat e telefonit të tre zyrtarëve amerikanë dhe udhëzime për shqiptimin e emrave të pjesëmarrësve rusë, duke përfshirë edhe “Mr. President POO-tihn”. (Vladimir Putin)

Dokumentet gjithashtu tregonin saktësisht dhomat ku do të zhvilloheshin takimet dhe një drekë në nder të Putinit, e cila u anullua që përfshinte sallatë jeshile me uthull me shampanjë, filet mignon ose halibut me patate dhe asparagus, dhe për ëmbëlsirë creme brûlée.

Plani i vendosjes së ulësve tregonte se Trump do të ulej përballë Putinit, pranë sekretarit të Shtetit Marco Rubio, sekretarit të Mbrojtjes Pete Hegseth dhe shefes së stafit të Shtëpisë së Bardhë Susie Wiles, ndër të tjerët.

Putin do të ulej pranë ministrit të Jashtëm rus Sergey Lavrov dhe këshilltarit të tij për politikën e jashtme, Yuri Ushakov. 

Dokumentet ishin përgatitur nga ekipi i Monika Crowley, zyrtare e Trump-it e cila shërbente si Kryeprotokolliste e Shteteve të Bashkuara, përgjegjëse për organizimin e takimeve.

Donald Trump dhe Monika Crowley

Crowley u pa duke përshëndetur ngrohtësisht Putinin gjatë samitit, ndërkohë që ishte përgjegjëse për koordinimin e vizitës së liderit rus dhe për organizimin e takimit thelbësor mbi një armëpushim të mundshëm në Ukrainë.

Crowley dhe Vladimir Putin

Incidenti me dokumentet ka ngritur shqetësime për “papërgjegjshmërinë dhe mungesën e organizimit” të administratës, sipas ekspertëve të sigurisë kombëtare. Zëdhënësja e Shtëpisë së Bardhë, Anna Kelly, e cilësoi situatën si “qesharake”, duke kritikuar raportimin e NPR mbi dokumentet si një tentativë të panevojshme për “gazetari investigative”.

Samiti Trump-Putin në Alaska ishte takimi i parë SHBA-Rusi që nga fillimi i pushtimit të plotë rus në Ukrainë në shkurt 2022. Lufta, më e përgjakshmja në Europë në 80 vitet e fundit, ka shkaktuar viktima nga të dyja palët, përfshirë mijëra civilë ukrainas./Versus.al

Dokumentet e gjetura në hotelin me katër yje:

Vladimir Putin dhe Donald Trump në Samitin e Alaskës

Presidenti amerikan Donald Trump po synon të organizojë një takim trepalësh me presidentin rus Vladimir Putin dhe presidentin ukrainas Volodymyr Zelensky, më 22 gusht. Lajmi vjen pas samitit të Alaskës dhe bisedimeve që Trump zhvilloi me liderët evropianë.

Sipas burimeve, Putin ka vendosur si kusht për paqen tërheqjen e plotë të Ukrainës nga dy provinca lindore  Donetsk dhe Luhansk.

Ai është shprehur i gatshëm të ndalojë avancimin në rajonet Kherson dhe Zaporizhia, të cilat do të mbeteshin me “linja të ngrira”.

Në të njëjtën kohë, një burim ukrainas ka bërë të ditur se pala amerikane ka krijuar përshtypjen se Putin mund të negociojë edhe për disa zona të vogla të rajoneve Sumy dhe Kharkiv, që aktualisht ndodhen nën kontrollin rus.

Megjithatë, kjo ofertë shihet si e papranueshme për Kievin, pasi do të kërkonte dorëzimin e territorit më të madh ukrainas në krahasim me atë që Rusia do të “sacrifikonte”. Për më tepër, Putin ka kërkuar që SHBA të njohin sovranitetin e Rusisë mbi territoret që do t’i mbeteshin Moskës në kuadër të një marrëveshjeje paqeje.

Në këtë proces shfaqet edhe Kina si faktor, pasi Putin ka deklaruar se mund të pranojë garanci sigurie për Ukrainën, por duke e përfshirë Pekinin si garantues, duke nënkuptuar kështu kundërshtimin ndaj një force sigurie të përbërë nga trupa të NATO-s.

Nga ana tjetër, Ukraina dhe mbështetësit e saj evropianë po shqyrtojnë idenë e një “koalicioni të vullnetarëve” që do të garantonte sigurinë e saj për të penguar një agresion të ri rus.

Në bisedën telefonike pas samitit të Alaskës, Zelensky është shprehur pozitiv ndaj idesë së garancive të sigurisë të mbështetura nga SHBA.

“Trump theksoi se nuk do të ishte një mision i NATO-s, por Kievi shpreson që SHBA të marrë pjesë në një formë. Ky diskutim pritet të vijojë gjatë vizitës së Zelenskyt në Shtëpinë e Bardhë”.

Zelensky: Rusia po e vështirëson fundin e luftës

Ndërkohë, presidenti ukrainas Volodymyr Zelensky akuzoi Rusinë se po refuzon një armëpushim dhe po e bën më të ndërlikuar arritjen e një marrëveshjeje paqeje.

“Shohim që Rusia po refuzon thirrjet e shumta për armëpushim dhe ende nuk ka vendosur të ndalë vrasjet. Kjo e komplikon situatën. Nëse nuk janë të gatshëm të japin një urdhër të thjeshtë për ndalimin e sulmeve, do të kërkohet një përpjekje shumë më e madhe që Rusia të pranojë diçka edhe më thelbësore: bashkëjetesën paqësore me fqinjët e saj për dekada”, shkroi Zelensky në një postim në platformën X mbrëmjen e së shtunës./Versus.al