Ish-ministri i Financave, Shkëlqim Cani është paraqitur ditën e sotme për të dëshmuar në komisionin hetimor në “Shëndetësi”, ku u pyet lidhur me veprimet e dikasterit që drejtonte në koncesionin e Chec Up.
Deputetja demokrate, Emilja Koliqi e pyeti Canin përse ministria e financave nuk ka bërë kontrollet për të gjetur dhe denoncuar analizat e parealizuara të Check-Up të cilat faturoheshin nga koncesionari. Ish-ministri tha se ministria që ai drejtonte nuk ka pasur asnjë kompetencë të tillë.
Ndër të tjera theksoi se kjo është përgjegjësi e vetë ministrisë së Shëndetësisë duke argumentuar se ministria e Financave nuk mund të kontrollonte çdo shifër parash të shpenzuar, gjë që duhej ta bënte auditi i brendshëm i ‘Shëndetësisë’ ose KLSH.
Pjesë nga diskutimi në komision:
Cani: Kërkesa juaj mesa kuptoj është përse ministria e Financave nuk ka bërë kontrollet për checkup-et e faturuara por jo të realizuara. Ky është një keqkuptim me apo pa dashje që është përhapur. Ministria e Financave nuk ka asnjë rol për të ushtruar kontroll të këtij lloji. Çdo ministri ka organet e veta të kontrollit.
Ne kemi gjykuar si pjesë pak konservatore që 450 mijë do ishte raport më i mundshëm i tyre dhe kemi thënë negocioni që të ulet numëri. Por kaq, nuk u imponohemi. Nuk hyjmë në gjëra kaq konkrete e të përditshme se këto janë të zgjidhura në përditshmëri.
Emilia Koliqi: Nuk keni pasur asnjë kritikë për dhënien me qira për energjinë elektrike. Pse ministria e Financave nuk ka ndërhyrë sepse ka një institucion apostafat?
Cani: Ne kemi drejtori auditi por për ministrinë e Financës, jo të tjerat. Rasti duhet të na vijë që të vihemi në aktivizim, nuk jemi KLSH. Po ju jap një rast praktik, mundësia për të bërë konkrata PPP është pothuajse në të gjithë degët e ekonomisë. Me përjashtime shumë të pakta. PSh të PPP e rrugëve, ministria e Financave nuk mund të gjykojë sesa centimetra duhet të jetë trashësia e asfaltit.
Koliqi: Por sesa është kostoja e asfaltit për km, po
Cani: Nëse ministrisë së Financave do i kërkohet që për çdo investim të ushtrojë kontrolle, përgjegjësia prandaj i është lënë komisionit të hartimit të studimit të Fizibilitetit sepse ata marrin të dhënat përkatëse. Nuk hyjmë dot ne në çdo lek investim që bëhet, është e pamundur. Është përgjegjësi e ministrisë përkatëse.
Koliqi: Ministria e Financave cdo 5 vite bën një vlerësim të punës së çdo auditi. Pse nuk është bërë një vlerësim i auditit të brendshëm për Ministrinë e Shëndetësisë dhe PPP
Cani: Kur raportohet nga auditi i ministrisë së Shëndetësisë, ka në varësi morinë e klinikave e spitaleve dhe raportimi i çdo auditi nuk mund të përmbledhë çdo ngjarje. Ato përgjithësisht raportojnë fenomene, jo çdo rast dhe prandaj quhet përmbledhje. Unë personalisht kam bërë denoncimet përkatëse kur më kanë ardhur rastet. Nuk kam nënvlerësuar asnjë raport të auditit. Versus.al
