Klasa e lartë demokrate u mblodh këtë fundjavë në Hamptons për diçka që i ngjante një dasme mbretërore politike — një event që bashkoi botën e parave, pushtetit dhe figurat që qëndrojnë pas epokës Clinton.
Të sapomartuarit ishin Alex Soros, djali i George Soros — donatorit më bujar të Partisë Demokrate — dhe Huma Abedin, ndihmësja politike që shpesh përshkruhet si vajza e Hillary Clinton. Dasma u mbajt të shtunën në Water Mill, Nju Jork, në një nga pronat e familjes Soros, duke tërhequr avionë privatë dhe ish-ndihmës të Clintonëve, që u mblodhën të gjithë në të njëjtin vend.
Të ftuarit — nga Clintons te Kamala Harris
Përveç familjeve të çiftit, lista e të ftuarve përfshinte znj. Clinton dhe bashkëshortin e saj, ish-Presidentin Bill Clinton; ish-Nënpresidenten Kamala Harris dhe bashkëshortin e saj, Doug Emhoff; Senatorin Chuck Schumer; Nancy Pelosi; personazhe të famshëm si Nicky Hilton Rothschild; figurat kulturore si Anna Wintour; Susie Tompkins Buell; dhe Edi Rama, kryeministri i Shqipërisë.
Një nga momentet që tërhoqi vëmendjen ishte prania e kryeministrit shqiptar, Edi Rama, i cili jo vetëm ishte i ftuar mes elitës politike, financiare dhe mediatike, por madje mbajti edhe fjalim për çiftin.
Rama, që duket se di si të qëndrojë gjithmonë “në qendër të skenës”, u ngjit për të folur krah figurave si Anna Wintour, Jonathan Soros dhe Hillary Clinton, duke u shndërruar nga lideri i një vendi të vogël ballkanik, në personazh që lë gjurmë edhe mes VIP-ave të Hamptons.
Një detaj që me siguri do të zgjojë kureshtjen e publikut, që tani pyet: Çfarë tha Rama, dhe a po synon ai të luajë rol edhe përtej Adriatikut?
Boyz II Men performuan në dasmë, ndërsa ndër folësit që mbajtën dolli ishin vëllai i Alex Soros, Jonathan, znj. Clinton, Anna Wintour dhe Edi Rama. Pjatat që u shërbyen përfshinin agnolotti me tartuf, supë angleze me bizele të ftohta dhe Wagyu amerikan me karkaleca të pjekur
Festa që përkon me kaos
Eventi u zhvillua ndërsa vendi po kalonte nga protesta që kundërshtonin Presidentin Trump, vrasjen e një ligjvënësi nga Minesota dhe sulmet mes Izraelit dhe Iranit që po rrisnin frikën e zgjerimit të konfliktit.
Në Hamptons, situata ishte krejt ndryshe, autokolona me SUV të zinj transportonin të ftuarit përgjatë rrugës që të çonte te rezidenca e Soros, e rrethuar nga lule vjollcë.
Alex Soros, figurë që po merr rol qendror
Alex Soros, 39 vjeç, i diplomuar për histori, ka marrë rolin që i ati, tani 94 vjeç, kishte si filantrop. Ndryshe nga i ati, ai e ka quajtur veten “më politikan” dhe poston rregullisht takime me liderë të Partisë Demokrate.
Marrëdhënia e tij me Huma Abedin, 49 vjeçe, ka tërhequr vëmendjen e shoqërisë, edhe për faktin që martesa e saj e mëparshme me Anthony Weiner përfundoi me skandale.
Sipas Vogue, çifti fillimisht kishte menduar të martoheshin privatisht, por pas presionit që morën nga të ftuarit, vendosën të organizonin një dasmë tradicionale.
Një çift që qëndron në qendër të vëmendjes
Hillary Clinton u shpreh: “Mendoj se ajo e meriton… Ajo e meriton të ketë këtë moment.”
Dasma përfshiu edhe ceremoni që nderuan si besimin mysliman të znj. Abedin, ashtu edhe trashëgiminë hebreje të z. Soros.
Huma Abedin, nga prapavija tek qendra e skenës
Ndryshe nga Alex, Huma Abedin ka qëndruar më private. Ajo filloi të punonte për Hillary Clinton si praktikante 19-vjeçare, ndërsa ishte studente, dhe gradualisht mori role që e vendosën nën dritën e skenës. Ajo botoi edhe një autobiografi në 2021 dhe tani kontribuon si analiste në MSNBC.
Tani, martesa e saj me Alex Soros pritet t’i forcojë ata si çift që qëndron natyrshëm nën vëmendjen e publikut.
Hamptons, vendtakimi i elitës demokrate
Gjatë fundjavës, Hamptons u shndërrua në vendtakimin e figurave të epokës Clinton. Të ftuarit mbushën hotelet e shtrenjta, u mblodhën për darka dhe pije, dhe trafiku u bë kaotik./ Marrë me shkurtime nga New York Times.
