Ish-deputeti dhe ish-kandidati i PD për kreun e bashkisë së Elbasanit, Luçiano Boçi i ftuar në emisionin “Kjo Javë” në News24, foli për përshkallëzimin e aksionit opozitar duke komentuar edhe protestën e mbajtur më 7 tetor ku u hodhën molotovë drejt institucioneve kryesore dhe drejt efektivëve të policisë.
Boçi tha se kërkohet më shumë agresivitet në mosbindje civile ndërsa theksoi se do të vijohet me të njëjtin skenar deri në arritjen e qëllimit të PD-së të cilin kryedemokrati Sali Berisha e cilësoi shumë qartë “qeveri teknike pa Ramën si kryeministër”.
“Instaloi standardin e sjelljes së aksionit politik të PD në raport me mosbindjen civile. Është përballje dhe kryerja e çdo lloji veprimi që ne të arrijmë qëllimin tonë sepse situata është e destabilizuar nga ana politike. Ne do vijojmë me këto përpjekje deri në arritjen e qëllimit tonë.
Duam që të vazhdojë më tej dhe të agresohet më shumë. Njerëzit janë të karikuar dhe nuk janë nga ato bateritë që duhet t’i karikojmë ne. Janë me autonomi, nuk e kanë impulsin e jashtëm, por të brendshëm. Protesta është komunikim politik, dhe kur ti i del në ballë, jep mesazhin se je për interesat e tyre, jo për interesa personale”, tha Boçi.
Ndërsa një koment e pati edhe për anulimin e seancës plenare gjatë vizitës së Erdogan duke thënë se seanca mund të ishte mbajtur pasdite, por sipas tij Spiropali zgjodhi të zbatonte urdhrin e Ramës. Versus.al
