Agron Shehaj, kreu i partisë "Mundësia", i është përgjigjur kryedemokratit të PD Sali Berisha pasi ky i fundit e quajti të pabesë duke pretenduar se ka marrë databazën e PD kur u largua.
Shehaj tha se nuk bëhet fjalë për asnjë lloj shkelje të kodit moral dhe se databasën e votuesve të PD ka qenë ai vetë që ia ka dhënë Berishës kur vulën e partisë e mbante zyrtarisht Basha.
“Thotë është e pamoralshme, por është e pamoralshme nga ana e tij. Ne nuk marrim anëtarë të PD në telefon, i marrim të gjithë. Të themi të vërtetën, në garën me Bashën, Basha më ka mohuar të drejtën e listave të votuesve të PD. Kur Basha vodhi gjithçka, Partia Demokratike që njihja unë si të vërtetë, ajo e Berishës ishte pa gjë. Të vetmet informacione që kanë pasur për të rindërtuar PD janë marrë nga unë. I kam ndihmuar me informacione në lidhje me strukturat. Me ato që u kam dhënë këta më akuzojnë se i kam vjedhur”, tha Shehaj i ftuar në emisionin "Now" me Erla Mëhillin në Euronews. Versus.al
