Gjykata e Apelit i ka dhënë sot Sali Berishës vulën e Partisë Demokratike duke i dhënë fund një “sage” dy vjeçare për debatin se kujt i takon vula e partisë opozitare më të madhe të vendit.
Në vendimin përfundimtar, Gjykata e Apelit njohu ndryshimet e statutit të miratuara nga Kuvendi kombëtar të PD-së më 11 dhjetor 2021 që solli më pas zgjedhjet ku Sali Berisha u rikthye si kryetar i PD.
Deputeti Flamur Noka në një deklaratë për mediat pasi gjykata shpalli vendimin, e cilësoi si një “lajm të madh dhe ditë të gëzuar për gjithë demokratët” ndërsa tha se thirrja për bashkim në PD u bëhet të gjithë atyre të cilëve e konsiderojnë kryeministrin Edi Rama si armikun më të madh të vendit, duke mos përmendur Lulzim Bashën.
“Kthehuni në shtëpinë tuaj sepse ka vend për të gjithë për çdo person kundër këtij regjimi. U bëjmë thirrje vetëm atyre që regjimin e konsiderojnë të keqen në këtë vend dhe Edi Ramën e cilësojnë kreun e të keqes në këtë vend”- tha Noka ndër të tjera.
Vendimi i sotëm i gjykatës së Apelit i ka dhënë fund betejës më shumë se 2 vjeçare mes Lulzim Bashës, Sali Berishës dhe mbështetësve të tyre lidhur me drejtimin e Partisë Demokratike. Që prej përjashtimit që Lulzim Basha i bëri Berishës nga grupi parlamentar i PD-së pas shpalles non-grata nga SHBA, partia nuk ka gjetur qetësi për asnjë moment.
Berisha shpalli qëllimin e tij për t’u rikthyer në krye të partisë Demokratike dhe nisi takimet në mbarë vendin të quajtura “foltorja”. Më pas Kuvendi i organizuar më 11 dhjetor të vitit 2021 miratoi statutin e ri me anëtarët e rinj të kryesisë që solli më pas organizimin e zgjedhjeve të reja në maj të vitit 2022 ku Sali Berisha fitoi thellë ndaj kandidatit Ibsen Elezi. Në mars të vitit 2022, gjyqtari i Gjykatës së Shkallës së Parë Agron Zhukri i dha drejtimin e PD-së, Sali Berishës, vendim që u ankimua nga Enkelejd Alibeaj. Në të njëjtin muaj, Lulzim Basha dha dorëheqjen si kryetar i partisë Demokratike, duke lënë kompetent Enkelejd Alibeajn. Kjo për t’u rikthyer më shumë se një vit më pas, në maj të 2023-it me 4 pika të reja të propozimit të tij. Basha kandidoi përballë Gjergji Hanit për postin e kryetarit të PD dhe arriti të shpallej fitues me 16 mijë vota më 29 korrik.
Si mbështetësit e Rithemelimit, ashtu edhe ata të Bashës vazhdimisht për 2 vite me radhë kanë pretenduar drejtimin dhe legjitimitetin në krye të Partisë Demokratike por sot, gjykata e Apelit dha një verdikt përfundimtar duke e mbyllur një herë e mirë këtë çështje me dhënien e vulës si kryetar, Sali Berishës. Versus.al
