Kandidatura e gjeneralit në pension Eric Wendt për postin e ambasadorit të Shteteve të Bashkuara në Shqipëri hyn këtë javë në një fazë vendimtare të procesit të konfirmimit në Uashington.
Më 4 qershor, Komiteti për Marrëdhënie me Jashtë i Senatit amerikan do të zhvillojë një seancë të posaçme, gjatë së cilës senatorët do të shqyrtojnë dhe do të votojnë mbi emrin e të nominuarit nga presidenti amerikan për të përfaqësuar SHBA-në në Tiranë.
Nëse kandidatura e Wendt merr miratimin e komitetit, ajo do t’i kalojë Senatit të plotë për votimin final, që konsiderohet edhe hapi i fundit procedural përpara konfirmimit zyrtar dhe marrjes së detyrës si ambasador në Shqipëri.
Seanca e 4 qershorit vjen pas dëgjesës publike të zhvilluar më 20 maj në Uashington, ku Eric Wendt prezantoi vizionin e tij për marrëdhëniet shqiptaro-amerikane dhe iu përgjigj pyetjeve të senatorëve mbi çështje të rëndësishme që lidhen me Shqipërinë.
Gjatë paraqitjes së tij, ai u pyet për luftën kundër korrupsionit, rolin e Strukturës së Posaçme Kundër Korrupsionit dhe Krimit të Organizuar (SPAK), klimën e investimeve amerikane në vend, si dhe bashkëpunimin strategjik mes dy vendeve në fushën e sigurisë dhe mbrojtjes.
Ndryshe nga seanca publike e muajit maj, mbledhja e radhës do të zhvillohet në formatin procedural të njohur si “Executive Session”, ku anëtarët e komitetit diskutojnë dhe votojnë nominimet përpara se ato të kalojnë në sallën plenare të Senatit.
Në dëshminë e tij, Wendt theksoi se prioritetet kryesore të mandatit të tij në Shqipëri do të jenë forcimi i shtetit ligjor, lufta kundër korrupsionit dhe krimit të organizuar, thellimi i partneritetit ushtarak mes Tiranës dhe Uashingtonit, si dhe mbështetja për sigurinë kibernetike.
Ai vlerësoi gjithashtu punën e SPAK-ut në luftën kundër korrupsionit dhe nënvizoi nevojën për krijimin e një mjedisi më të favorshëm për investitorët amerikanë, duke garantuar konkurrencë të ndershme dhe zbatim të barabartë të ligjit.
Nëse emri i tij merr dritën jeshile nga Komiteti për Marrëdhënie me Jashtë, Eric Wendt do të jetë vetëm një votim larg emërimit zyrtar si ambasadori i ri i Shteteve të Bashkuara në Shqipëri, duke pasuar përfaqësimin diplomatik amerikan në një periudhë të rëndësishme për marrëdhëniet mes dy vendeve.
