Partia Demokratike duket se ende nuk ka arritur në një konsensus sa i takon çështjeve të ndryshme politike që tashmë janë në qendër të diskutimeve për sesionin e ri politik.
Së fundmi, një përplasje mes deputetëve është shfaqur sa i takon bojkotit të komisionit Antikorrupsion të drejtuar nga Fatmir Xhafaj, komision për të cilin ligjvënësit patën kritika duke e cilësuar si një mënyrë për të kontrolluar punën e SPAK.
Deputeti Luan Baçi deklaroi në një emision televiziv se PD do të marrë pjesë në mbledhjet e komisionit Antikorrupsion me nisjen e sesionit të ri parlamentar. Ai u shpreh se komisioni nuk duhet të bojktohet pasi ka edhe mbështetjen e ndërkombëtarëve.
“Kur ngrihen komisione në parlament dhe kur janë të mbështetura nga ndërkombëtarët ne nuk mund ti bojkotojmë dhe të lëmë PS të bëj si pas qejfit. Opozita për këtë punë është, nëse i bie me këtë logjike po në Kuvend pse të shkojmë ne! Nuk është një marrëveshje por detyrë që ne kemi për ta bërë si deputet në parlament. Në shkojmë dhe në komisione të përhershme parlamentare ne nuk kemi shumicë votash por ne marrim pjesë.
Do të marrim pjesë në komision. Ne ishim ata që kemi kërkuar që ky komision çfarë atributesh do të ketë, çfarë do të reformojë. Pasi është diskutuar në struktura dhe me specialistë mund të ketë një vendimmarrje për të marrë pjesë në komision për të mos lënë mazhorancën që të bëjë çfarë të dojë"- tha Baçi në Repolitix në Report Tv.
Ndërsa qëndrim ndryshe ka pasur kreu i grupit parlamentar, Gazment Bardhi i cili tha për Report Tv se PD nuk ka ndryshuar qëndrim lidhur me bojkotin e komisionit.
“Nuk ka asnjë ndryshim qëndrimi dhe as një diskutim të ri mbi këtë çështje”, tha Bardhi.
Përplasja në PD vjen pas publikimit të listës me drejtuesit e qarqeve, ku kreu i grupit parlamentar Gazment Bardhi u caktua në krye të fushatës për qarkun e Fierit, qark që më parë e ka drejtuar Baçi në fushata elektorale. Ndërsa ky i fundit, nuk mori drejtimin e asnjë prej qarqeve. Versus.al
