I ftuar sonte në studion e “Opinion”, kryetari i Partisë Demokratike Sali Berisha. Pyetja e parë që moderatori Blendi Fevziu i shtroi ishte “pse nuk ka figura të reja në PD?” E përpos kësaj, pse një pjesë e emrave janë lënë jashtë listave zgjedhore?
Për t’ju përgjigjur, kryedemokrati rreshtoi një sërë personazhesh që sipas tij meritojnë të jenë pjesë e këtij rrugëtimi që synon fitoren, sepse kanë kaluar në një proces të vështirë.
“PD kaloi në një kalvar të padëgjuar ndonjëherë, ekzistence ose jo…Këta njerëz u rreshtuan në krahun e ekzistencës së një partie politike jashtë kontrollit të Edi Ramës, ambasadës apo tjetër kujt. Flamur Noka, Oerd Bylykbashi, Albana Vokshi, Belind Këlliçi, Besart Xhaferri, Edmond Spaho, Ivi Kaso e të tjerë e një grup i tërë u përballën ama në zgjedhjen e tyre.
Zgjodhën të mbështesnin një kauzë që zgjodhi Berisha. Pa mbështetjen e këtyre individëve, PD-ja nuk do ishte kurrë një forcë siç është sot, por një shtojcë, një fasadë e opozitës. Opozita sovrane nuk është çështje partie, por themelore e pluralizmit. Eee po ju keni qenë…Kanë qenë more, por meritojnë nderimin më të madh se kaluan një proces”, tha Berisha.
