Mbyllet ora zyrtare e votimit për balotazhin në 18 komunat e Kosovës, ku qytetarët u thirrën të zgjidhnin kryetarët e rinj. Sipas të dhënave të Komisionit Qendror të Zgjedhjeve, pjesëmarrja deri në orën 17:00 llogaritet vetëm rreth 27-28%, duke treguar një interes të ulët krahasuar me rundin e parë të zgjedhjeve lokale më 12 tetor.
Komunat ku zhvillohet balotazhi janë: Prishtina, Prizreni, Peja, Juniku, Dragashi, Gjakova, Kaçaniku, Fushë Kosova, Mitrovica e Jugut, Rahoveci, Suhareka, Gjilani, Vitia, Vushtrria, Obiliqi, Klina, Mamusha dhe Kllokoti.
Kreu i KQZ-së, Kreshnik Radoniqi, gjatë konferencës për media u shpreh se votimi me asistencë është i garantuar vetëm për personat me aftësi të kufizuara, por ka pasur ankesa për abuzim me këtë të drejtë. “Kjo nuk do të thotë që të gjithë mund të përfitojnë asistencë në mënyrë të paarsyeshme,” tha Radoniqi, duke theksuar se aftësia e kufizuar e votuesit duhet të vërtetohet me dokumente zyrtare.
Ai sqaroi gjithashtu se personat që nuk dinë të lexojnë e shkruajnë mund të marrin udhëzime për të votuar, por nuk mund të kenë ndihmë direkte brenda kabinës së votimit.
Kjo dalje e ulët e qytetarëve dhe përplasja mbi votimin me asistencë ngre pyetje serioze për legjitimitetin dhe interesin e qytetarëve, ndërsa balotazhi duket se po zhvillohet nën hijen e mosbesimit dhe kritikave publike.
