Opozita do të zhvillojë sot protestën e radhës para bashkisë Tiranë, në vijim të tubimeve që kanë nisur prej muajit mars pas publikimit të skandalit “5D” për të cilin SPAK arrestoi disa drejtorë të bashkisë.
Për tubimin e njoftuar për t’u mbajtur në orën 11:00 të paraditës së sotme, policia ka publikuar masat që konstatojnë në bllokimin e disa segmenteve rrugore.
“Në kuadër të një tubimi që do të zhvillohet ditën e nesërme, në orën 11:00, përpara Bashkisë Tiranë, do të ketë bllokime të disa segmenteve rrugore, si dhe bllokime të pjesshme të disa segmenteve të tjera në varësi të lëvizjes së tubuesve.
Njoftojmë qytetarët se duke filluar nga nesër, prej orës 09:30 e deri në përfundim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës”- njofton policia.
Në protestat e kaluara, akte të dhunshme si djegia e gomave, hedhja e bombave molotov si dhe përleshja me efektivët e policisë kanë qenë të zakonshme. Në protestën kombëtare që opozita organizoi mbrëmjen e 11 korrikut, protestuesit në mbyllje të tubimit, u drejtuan në bashkinë e Tiranës ku hodhën lëndë molotov pranë dritares së zyrës së kryebashkiakut Erion Veliaj.
Dorëheqja e këtij të fundit, ka qenë kërkesa themelore e bërë nga protestuesit e përhershëm para bashkisë së kryeqytetit. Versus.al
