Pas daljes nga Kuvendi ku u miratua përbërja e komisioneve parlamentare me listat e dorëzuara nga PD, kryedemokrati Sali Berisha foli para mediave lidhur me zhvillimet e fundit politike.
I pyetur nëse opozita ka një kandidat për bashkinë e Tiranës, Berisha tha se ka plot të tillë, por nuk përmendi emra.
“Ju garantoj se opozita ka jo një, por disa kandidatë të pakrahasueshëm në korpën e korrupsionit”- tha Berisha ndërsa theksoi se pavarësisht asaj që e konsideron si ‘masakër elektorale’, PD nuk mund të bojkotojë.
“Ka dy taktika. Ka qendrimin e bojkotit që mund të përdoret, por ajo kërkon lëvizje guerrile, gjë të cilën nuk e bëjmë dot. Ne jemi parti e të drejtave konservatore dhe prandaj nuk i bojkotojmë. Ne do bëjmë gjithçka të përmbysim shkakun madhor të farsës që është Edi Rama”- tha Berisha.
Berisha tha se regjimet diktatoriale nuk rrëzohen me votë duke lënë të kuptohet se duhet organizimi i protestave, por nuk dha një datë konkrete.
“Sapo ta kenë datën do ta komunikoj. Narkodiktaturat nuk ikin me votë, regjimet diktatoriale nuk ikin me votë, kjo është e provuar”- shtoi kreu i PD. Versus.al
