Partia Socialiste ka kërkuar përjashtimin nga Kuvendi për 5 deputetë të Rithemelimit të cilët rikthyen kaosin duke bllokuar foltoren gjatë seancës plenare të zhvilluar të enjten e kaluar.
Në kërkesën drejtuar Sekretariatit të Etikës, PS kërkon masë disiplinore për Flamur Nokën, Gazment Bardhin, Edi Palokën, Ervin Salianjin dhe Luan Baçin. Sekretariati i Etikës do të mblidhet ditën e sotme në orën 13:00 për të vendosur mbi kërkesën e PS.
Në seancën e kaluar, deputeti Flamur Noka u përjashtua nga salla pas ofendimeve ndaj kryeparlamentares Lindita Nikolla por u rikthye pak minuta më vonë duke shtyrë punonjësin e Gardës dhe duke tentuar t’i marrë mikrofonin deputetit të PS, Nasip Naço.
Reagimi i ashpër i deputetëve opozitarë erdhi pas rrëzimit të kërkesës së tyre për mocion me debat pas investigimit të Rai 3 ku ish.zv kryeministri Arben Ahmetaj hodhi akuza të forta ndaj kryeministrit Edi Rama për lidhjet e tij me eksponentë të krimit të organizuar.
Seanca plenare u shoqërua me protesta të mbështetësve të Rithemelimit jashtë godinës së Kuvendit. Versus.al
