Komisioni Qendror i Zgjedhjeve (KQZ) ka publikuar një relacion që përcakton procedurat për caktimin e partive politike që do të propozojnë anëtarët dhe sekretarët e Komisioneve të Zonave të Administrimit Zgjedhor (KZAZ) për zgjedhjet parlamentare të 11 majit 2025.
Sipas dokumentit, KQZ duhet të ngrejë KZAZ-të jo më vonë se 90 ditë përpara zgjedhjeve, në përputhje me nenin 28 të Kodit Zgjedhor. Partitë politike parlamentare do të kenë të drejtën të propozojnë kandidatët, bazuar në përfaqësimin e tyre parlamentar:
Dy anëtarë propozohen nga partia kryesore e shumicës parlamentare.
Dy anëtarë nga partia kryesore e opozitës.
Një anëtar nga partia e dytë e shumicës dhe një nga partia e dytë e opozitës.
Anëtari i shtatë ndahet sipas rrotacionit midis shumicës dhe opozitës.
Sekretari i KZAZ-së caktohet nga partia që propozon zëvendëskryetarin e KZAZ-së.
Bazuar në zgjedhjet e fundit parlamentare të vitit 2021, renditja e partive për ndarjen e vendeve është:
1. Partia Socialiste e Shqipërisë – 74 mandate.
2. Partia Demokratike (koalicioni PD-An) – 59 mandate.
3. Lëvizja Socialiste për Integrim – 4 mandate.
4. Partia Socialdemokrate – 3 mandate.
Ky vendim shënon një hap të rëndësishëm drejt organizimit dhe administrimit të zgjedhjeve të ardhshme, duke respektuar rregullat e Kodit Zgjedhor dhe balancat e përfaqësimit politik.
