Zëvendëskryeministrja Belinda Balluku, e cila njëkohësisht drejton politikisht Partinë Socialiste në Qarkun e Fierit, ka vizituar paraditen e së hënës Bashkinë e Fierit për të ndjekur procesin e emërimeve të reja në administratën lokale.
Sot pritet të zyrtarizohen katër nënkryetarët e rinj që do të punojnë ngushtë me kryetarin Armando Subashin.
Nënkryetarët e rinj janë:
Nusret Avdullai, ish-kandidat për deputet në zgjedhjet e fundit,
Erald Qirjo, aktualisht administrator i Njësisë Administrative Qendër,
Mirela Pitushi, ish-deputete e Partisë Socialiste,
Mariglen Hoxha, ish-kandidat për deputet.
Ristrukturimi i administratës së bashkisë, që nisi pas zgjedhjeve të 11 Majit, ka për qëllim forcimin e menaxhimit lokal përmes përfshirjes së figurave me eksperiencë politike dhe menaxheriale. Zyrtarizimi i emrave të rinj pritet të ndikojë në mënyrën e funksionimit të bashkisë dhe në koordinimin e punës me njësitë administrative.
Në krye të administratës është emëruar edhe Niko Neço si Sekretar i Përgjithshëm i Bashkisë së Fierit. Ai ka qenë më parë drejtor i prokurimeve dhe tani do të ketë kompetenca të zgjeruara në vendimmarrje, duke u bërë një nga figurat kyçe të ekipit drejtues.
Për pozicionin e drejtorit të Bashkisë ishte përfolur edhe ish-prefekti Lefter Shehaj, i cili refuzoi për arsye personale, duke hapur rrugën për një riformatim të plotë të ekipit drejtues.
Këto emërime “me porosi nga lart” synojnë shpërndarjen e kompetencave tek nënkryetarët dhe kufizimin e rolit të kryetarit, Armando Subashi, i cili është ish-deputet i Partisë Socialiste dhe drejton Bashkinë e Fierit që nga viti 2015, duke mbajtur mandatin e parë që më 22 Korrik 2015 dhe vazhdon të udhëheqë institucionin prej një dekade./Versus.al
