Duket se kreu i Partisë Demokratike, Sali Berisha ka ndërruar qëndrimin e tij në lidhje me me Strukturën e Posaçme Kundër Korrupsionit dhe Krimit të Organizuar (SPAK).
Kohë më parë jashtë godinës së SPAK ku Berisha u paraqit për zbatimin e masës së sigurisë “detyrim paraqitje”, tha se “është institucion për t’u shuar me çdo kusht”.
Gjithashtu zemërimi dhe për shkak të procedimit të tij në lidhje me privatizimin e ish-klubit sportive Partizanë në Tiranë, dosje për të cilën Berisha akuzohet për korrupsion pasiv, u drejtua dhe ndaj kreut të këtij institucioni Altin Dumani, duke e ofenduar rëndë.
Por ndoshta sondazhet brenda partisë së tij dhe perceptimi në publik për punën e SPAK kanë zmbrapsur kreun e PD-së duke moderuar qëndrimin e tij.
I ftuar së fundmi në emisionin ‘Opinion’ Berisha u shpreh se Partia Demokratike nuk lufton për shkrirjen e SPAK apo për largimin e kreut të saj aktual, por për t’i dhënë të drejtën qytetarëve për proces ligjor.
“Partia Demokratike nuk ka luftuar dhe nuk lufton për shkrirjen e SPAK, as për largimin e Altin Dumanit. PD ka luftuar dhe do luftojë për të drejtën e këtyre qytetarë për proces ligjor, të drejtë dhe që sot në mënyrë absolute nuk e kanë sepse sot kjo zonjë apo ky zotëri duhet të presë sipas statistikave zyrtare 15 vite për një proces civil në të gjitha shkallët”, tha Berisha duke shtuar më tej:
Nuk ekziston në botë një sistem drejtësie ku prokurori që dërgon dosjen te gjykatësi i kontrollon telefonin dhe kontrollon gjykatësin. Kjo është asgjësim i gjykatësit. Është gjë e paimagjinueshme Pra problemet tona më themelore me drejtësinë janë këto./Versus.al
