Ministri i Brendshëm Besfort Lamallari është përgjigjur në Kuvend gjatë interpelancës së kërkuar nga deputeti Klevis Balliu, lidhur me ngjarjen e rëndë në Lozhan të Maliqit, ku humbi jetën efektivi i Policisë së Shtetit Enea Mekolli, ndërsa u plagos kolegu i tij Edison Adri.
Gjatë fjalës së tij, Lamallari deklaroi se kanë nisur hetimet për zbardhjen e plotë të rrethanave të ngjarjes, si nga Drejtoria e Përgjithshme e Policisë së Shtetit, ashtu edhe nga Agjencia e Mbikëqyrjes Policore (AMP).
“Ka nisur një hetim i plotë… vetëm një hetim i tillë mund të japë përgjigje për të gjitha pyetjet”, u shpreh ministri, duke theksuar se procesi duhet të jetë i pavarur dhe pa ndikime politike.
Ai shtoi se nuk do të japë komente mbi çështjen deri në përfundimin e hetimeve, por garantoi transparencë të plotë sapo të dalin rezultatet zyrtare. “Hetimi do të jetë i plotë dhe shterues, sepse bëhet fjalë për drejtësi për një efektiv që nuk është më mes nesh”, tha Lamallari.
Ministri bëri me dije gjithashtu se familja e Mekollit dhe efektivi i plagosur kanë përfituar mbështetje financiare, ndërsa është nisur edhe procedura që djali i mitur i Mekollit të përfitojë nga ligji për fëmijët në mbrojtje të Republikës.Versus.al
