Gjykata e Tiranës e ka vlerësuar si të ligjshëm arrestimin e reperit Rigels Rajku dhe DJ të tij në Shëngjin pas mesnatës së djeshme pasi ishin shpallur në kërkim nga policia e Kosovës për rrahjen e personazhit të TikTok-ut, Medi Iseni më 2 gusht në Pejë.
Pas caktimit të masës së sigurisë, Noizy dhe DJ i tij Bahtjar Bajraktari do të ekstradohen drejt Kosovës.
“Pranimin e kerkesave te Prokurorise prane Gjykates se Shkalles se Pare te Juridiksionit te Pergjithshëm Tirane. Te vleftesoje si te ligjshem arrestimin e perkohshem, te kryer ne date 07.08.2024, ora 07:30, per qillime ekstradimi, te shtetasit R. R.. Te caktoje ndaj shtetasit R. R., masen shtrenguese “Arrest ne burg” per qellime ekstradimi, te parashikuar nga nenet 238 dhe 493 te Kodit te Procedures Penale”- thuhet në njoftimin e gjykatës së Tiranës.
Rikujtojmë se ditën e djeshme artistët shqiptarë kanë dalë në mbrojtje të reperit Rigels Rajku, duke ngritur kauza #freenoizy, por me sa duket Gjykata vendosi të zbatojë të kundërtën.
Ndërsa dy ditë më parë edhe Noizy bëri një postim në rrjete sociale ku mohonte të gjitha akuzat që rëndonin kundrejt tij duke thënë se nuk ishin asgjë më tepër se veç shpifje.
Ngjarja ndodhi më 2 gusht në një lokal nate në Pejë ku Noizy kishte shkuar për të performuar. Medi Iseni u paraqit në spitalin e Pejës me plagë të rënda të shkaktuara nga goditjet e një grupi personash mes të cilëve ai pretendon të ketë qenë edhe Noizy. Në deklaratat e bëra, Iseni ka akuzuar reperin Arkimed Lushaj se e ka nxjerrë në pritë që më pas të dhunohej nga Noizy dhe grupi i tij. Vetë “Stresi”, është i shpallur në kërkim për ngjarjen dhe ka një urdhër-arresti për të. Versus.al
