Thika me të cilën kreu krimin

Durrës- Fatjon Janina, 39 vjeçari që vrau me thikë e çekiç fqinjin e tij të moshuar Paulin Gina, ka pranuar krimin e rëndë gjatë deklaratës në polici.

Ai deklaroi se kishte shkuar në shtëpinë e fqinjit pasi i moshuari i kishte 200 mijë lekë borxh. Madje ai ka pretenduar edhe se 82 vjeçari i ndjerë ka tentuar ta godasë me çekiç. Sipas autorit, ngjarjen e rëndë e ka kryer pas ofendimeve të vazhdueshme të viktimës.

“Po unë e vrava Paulinin. Me kishte 200 mije lekë borxh, e pashë dje që po dilte nga shtëpia nga kati i 5 ku unë  banoj te sheshpushimi i shkollave. I thashë hajde flasim për atë borxhin që më ke se më duhen lekët për vitin e ri. U futëm të shtëpia e tij. Debatuam aty dhe me tha nuk kam lekë. Me ofendoi, me tha drogaxhi. Aty e humba qetësinë, u përleshem afro 1 orë.

Ai donte të me godiste me çekiç, unë gjeta një thikë e qëllova disa herë. Pastaj e qëllova edhe disa here me çekiç derisa ngeli i shtrirë në tokë. Më pas mora thikat dhe çekiçin dhe i dërgova në shtëpinë time. Kur dola mbyllja edhe derën e jashtme të tij me çelës. Shkova në shtëpi fsheha thikat dhe çekiçin, ndërrova edhe rrobat e gjakosura dhe më pas në gjendje të rënduar psikologjike ika edhe nga shtëpia unë nga frika e policisë”, tha 39 vjeçari Fatjon Janina.

Ngjarja raportohet të ketë ndodhur gjatë pasdites së djeshme në lagjen nr.16 në Durrës. Janina ka shkuar në banesën e të moshuarit, ndërsa më herët kishte raportime se autori mund ta ketë kryer krimin edhe për shkak se i moshuari mund të mos ketë pranuar t’i jepte para borxh. Hetimet vijojnë për zbardhjen e plotë të ngjarjes. Versus.al

Durrës- Policia ka zbardhur ngjarjen e ndodhur mbrëmjen e djeshme në lagjen e plazhit ku 82 vjeçari Paulin Gina u gjet i masakruar me thikë brenda banesës së tij.

Në kërkim u shpall 39 vjeçari Fatjon Janina si autor i dyshuar i krimit të rëndë, i cili u arrestua pas disa orësh. Ekspertiza mjekoligjore konstatoi dëmtime të shumta me çekiç dhe thikë në trupin e viktimës.

Autori rezulton të ketë qenë fqinj me të moshuarin dhe pas ngjarjes së rëndë ka mbyllur me çelës derën e banesës së viktimës dhe është arratisur.

Gjatë kontrollit në banesën e autorit të dyshuar, Policia gjeti dhe sekuestroi në cilësinë e provave materiale 2 thika, 1 çekiç dhe veshjet që dyshohet se ka patur autori gjatë kryerjes së krimit.

Mjeti prerës, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme. Ngjarja e rëndë u zbulua pasditen e djeshme rreth orës 18:00 pasi familjarët e të moshuarit që jetonte vetëm, nuk kishin arritur të komunikonin me të nga jashtë shtetit. Versus.al

Durrës- Një ngjarje shumë e rëndë ka ndodhur mbrëmjen e djeshme në qytetin bregdetar ku një i moshuar është gjetur i vrarë me thikë brenda banesës së tij.

Viktima është identifikuar si 82-vjeçari Paulin Gina, i cili sipas të dhënave paraprake ka shenja plagësh thike në fytyrë. Paraprakisht deklarohet se i moshuari jetonte vetëm, pasi të afërmit e tij ndodheshin jashtë vendit, në Itali. Ka qenë familja që ka ngritur alarmin, pasi nuk ka arritur të kontaktojë me të nëpërmjet telefonit.

Pas i moshuari nuk i është përgjigjur, familjarët kanë njoftuar policinë.

Forcat e rendit dhe zjarrfikësja kanë shkuar në banesën e tij dhe kanë konstatuar 82-vjeçarin pa shenja jete dhe me shenja të shkaktuara nga një mjet prerës në fytyrë. Versus.al