Deputeti Dash Sula pasi u la jashtë nga listat e mbyllura në Partinë Demokratike ka njoftuar se i është bashkuar koalicionit 'Nisma Shqipëria Bëhet'.
Në kanalet e tij të komunikimit Sula shkruan se i është shumë mirënjohës Adriatik Lapajt, Endi Shabanit dhe Pano Sokos të cilës e ftuan t'i bashkohet koalicionit të tyre. Sula shton më tej se mendon se Shqipëria bëhet vetëm me djem të rinj.
Deputeti shkruan gjithashtu ndër të tjera se nuk ishte zhgjedhja e tij të largohej nga Partia Demokratike pasi sipas tij i ka dhënë 20 vite vite të jetës së tij politike pa i kërkuar asnjë ofiq në kohën kur ishte në pushtet.
Reagimi i Dash Sulës:
Të dashur miq,
Jam i lumtur t’u njoftoj se demokratët e Elbasanit do ti përfaqësoj në Parlamentin e ardhshëm nën siglën e koalicionit “Nisma Shqipëria Bëhet”.
U jam shumë mirënjohës Adriatik Lapaj, Endri Shabani dhe Pano Soko, këtyre djemve të rinj dhe të papërfolur, që më ftuan të kandidoj në zgjedhjet e 11 majit. Unë i falenderoj dhe shpreh mirënjohje edhe për drejtuesit e forcave te tjera politike që për etikë nuk po i përmend që më ftuan të bashkohesha në ekipin e tyre pas medalies që më dhanë si “SPAKIST”. Mendoj se Shqipëria Bëhet dhe bëhet vetëm me djem të rinj.
Nga sot, do të nis takimet me përkrahësit e mi, të cilët edhe në një ditë shumë të vështirë si ajo e djeshmja, më qëndruan pranë dhe më mbështetën.
U kërkoj ndjesë të gjithë atyre që nuk kam arritur tu përgjigjem, ju falenderoj përzermërsisht për fjalët.
Ma besoni, nuk ishte zgjedhja ime të largohesha nga Partia Demokratike. I kam dhënë asaj partie 20 vite të jetës sime politike, pa i kërkuar asnjë ofiq në kohën kur ishte në pushtet.
Kam sakrifikuar kohën time, i kam hyrë në hak familjes sime dhe fëmijëve të mi, për të punuar cdo ditë për PD-në, por nuk mund të lejoja që kontributi im të hidhej në koshin e plehrave vetëm se kam shprehur mbështetjen time të palëkundur për institucionet e reformës në Drejtësi. Po e them që tani, SPAK-ist do të jem edhe në Parlamentin e ardhshëm sepse besoj që po i bën vendit një shërbim që kjo klasë politike nuk ka arritur tia bëjë në 35 vite.
Na priftë e mbara deri në 11 Maj! Versus.al
