Sot në orën 17:00 Partia Demokratike ka paralajmëruar bllokimin e qarkullimit në 5 pika kyçe të kryeqytetit në vazhdën e aksionit të mosbindjes civile. Për këtë tubim, ka reaguar edhe policia e cila nëpërmjet një njoftimi zyrtar bën me dije se në përgjigjen e kthyer ndaj PD theksohet se bllokimi i rrugëve është vepër penale.
Më tej thuhet se drejtuesit dhe organizatorët e tubimit do të mbajnë përgjegjësi administrative dhe panela, pasi bllokimi i rrugëve cënon rendin publik dhe sigurinë e qytetarëve.
“Në zbatim të germës “a” të nenit 6 të ligjit nr. 8773, datë 23.04.2001, “Për Tubimet”, Drejtoria Vendore e Policisë Tiranë i ka kthyer përgjigje subjektit politik se organizimi i tubimeve në disa segmente rrugore në bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat.
Gjithashtu, Drejtoria Vendore e Policisë Tiranë ka bërë me dije Sekretarin Organizativ të Partisë Demokratike se bllokimi i rrugëve është vepër penale dhe se për veprime në kundërshtim me ligjin, organizatori, drejtuesi i tubimit dhe pjesëmarrësit në tubim, do të mbajnë përgjegjësi administrative dhe penale, në zbatim të germës a, të nenit 24 të ligjit nr.8773, datë 23.04.2001 “Për Tubimet” dhe nenit 293 të Kodit Penal të Republikës së Shqipërisë”- thuhet në njoftim.
Policia ka marrë masa që në rast të bllokimit të akseve rrugore, trafiku i automjeteve të devijohet në rrugë alternative. Versus.al
