Kryeministri i Britanisë së Madhe, Keir Starmer do të nisë sot vizitën dy ditore në Tiranë ku përveç samitit politik evropian që do të zhvillohet, do të përpiqet të rrisë bashkëpunimin me migrimin dhe për të zgjeruar iniciativat e përbashkëta me Shqipërinë dhe Kosovën.
Starmer zbuloi një plan për ngritjen e një task force për migracionin për të bërë të mundur kontrollin e këtij fenomeni të paligjshëm. Ai do të vizitojë nga afër Portin e Durrësit për të parë nga afër sesi bashkëpunimi mes dy vendeve po bën të mundur kapjen e rrjetit të organizatorëve të migracionit të paligjshëm.
Në tre vitet e fundit, ka patur një ulje prej 95% të mbërritjeve të shqiptarëve me gomone në Angli. Ndërsa numri i shqiptarëve të kthyer në vend ka patur një rritje të ndjeshme.
Por pavarësisht këtyre shifrave, kryeministri Starmer do të njoftojë zgjerimin e Task-forcës së përbashkët me migracionin me Shqipërinë, Kosovën, Maqedoninë e Veriut dhe me Malin e Zi.
Task Forca bashkon specialistë nga vendet e përfshira për të hartuar dhe ekzekutuar operacione për të zbuluar, penguar dhe menaxhuar migracionin e paligjshëm. Kjo do të sjellë edhe vendosjen e dronëve të financuar nga Mbretëria e Bashkuar për të kapur gangsterët që merren me trafikimin e migrantëve përmes korridorit të Ballkanit Perëndimor dhe Mbretërisë së Bashkuar.
Mbretëria e Bashkuar gjithashtu do të mbështesë Kosovën dhe Shqipërinë për të përforcuar kontrollet në pikat e kalimit kufitar.
Zgjerimi i task forcës vjen përpara Samitit të Ballkanit Perëndimor të organizuar nga Mbretëria e Bashkuar në vjeshtë, i cili pritet të përqendrohet në sigurinë rajonale, rritjen ekonomike dhe përballimin e sfidave të përbashkëta, siç janë ndërhyrja e huaj dhe migrimi i paligjshëm me zgjidhje inovative.
“Sfidat globale kërkojnë zgjidhje të përbashkëta, dhe puna që Mbretëria e Bashkuar dhe Shqipëria po bëjnë së bashku po ofron siguri për njerëzit që punojnë në të dy vendet. Dhe puna jonë e përbashkët për të penguar, zbuluar dhe kthyer emigrantët e paligjshëm është një provë e mëtejshme se ndërhyrja në rrjedhën e sipërme për të mbrojtur brigjet britanike dhe për të siguruar kufijtë tanë është qasja e duhur”- u shpreh Starmer.
Të dy vendet do të nisin gjithashtu një projekt të ri për të luftuar financat e paligjshme dhe për të hetuar rrjedhat e financimit të fshehtë që pastrojnë paratë e pista midis Shqipërisë dhe Mbretërisë së Bashkuar.
Dy makina zbulimi falsifikimesh do t'i dhurohen gjithashtu Policisë së Shtetit Shqiptar për të identifikuar shpejt mospërputhjet dhe për të konfirmuar vërtetësinë e dokumenteve përmes kontrolleve të rregullta, duke u lejuar zbatuesve të ligjit në Shqipëri të gjurmojnë dhe kapin individë që përpiqen të hyjnë ilegalisht në Mbretërinë e Bashkuar me pasaporta të vjedhura ose të falsifikuara. Versus.al
